ރާއްޖޭގެ ތިން ސަރަހައްދެއްގައި މަސް ފެކްޓްރީ އެޅުމަށް ޗައިނާގެ ކުންފުންޏަކާއެކު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން ޅ. ފެލިވަރުގައި މަސް ބަންދުކުރާ ކާރުހާނާއެއް ތަރައްގީ ކުރުމާއި ގދ. ފިޔޯރީ އަދި ދ. މާދެލީގައި މުޅިން އަލަށް މަސް ކާރުހާނާ ގާއިމްކުރެވޭނެއެވެ.
މި މަޝްރޫއު ހަވާލު ކޮށްފައި ވަނީ، ޗައިނާ ސަރުކާރު ހިއްސާވާ ކުންފުންޏެއްކަމަށްވާ ޑޮންގްފަންގް އިލެކްޓްރޯނިކް އިންޓަރނޭޝަނަލް ކޯރޕަރޭޝަނާއެވެ.
ރާއްޖޭގައި މަސް ބަންދުކުރުމަށް ހުރި ޖާގައިގެ ދަތިކަން ޙައްލުކޮށް ގޮންޖެހުންތައް ނައްތާލުމަށް ހިންގާ މި މަޝްރޫޢުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ، މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމެވެ.
މި މަޝްރޫއުގެ ދަށުން ދ. މާދެލީގައި ގާއިމުކުރުމަށް ހަމަޖެހިފައިވަނީ 50 ޓަނުގެ މަސް ޕްރޮސެސްކުރާ ފެސިލިޓީއަކާއި 1500 ޓަނުގެ ކޯލްޑް ސްޓޯރޭޖެކެވެ. މަސް ބަނދަރުގެ އިތުރުން އޮޕަރޭޝަނަށް ބޭނުންވާ އެހެނިހެން އަސާސީ ވަސީލަތްތައް ގާއިމުކުރުންވެސް މި މަޝްރޫއުގެ ތެރޭގައި ހިމެނެއެވެ.
މި މަޝްރޫއުގެ ދަށުން ޅ. ފެލިވަރުގައި 100 ޓަނުގެ ފެކްޓްރީއެއް އަޅާއިރު މިކަމަށް 50 މިލިއަން ޑޮލަރު ހަރަދުވާނެ ކަމަށް ފިޝަރީޒް މިނިސްޓްރީން ވަނީ ބުނެފައެވެ.
ފިޔޯރީގައި ހަދާ 100 ޓަނުގެ ފެކްޓްރީ އެޅުމަށް 50-75 މިލިއަން ޑޮލަރު ހަރަދުވާނެއެވެ. މި ރަށުގައި 3،000 ޓަނުގެ ކޯލްޑް ސްޓޯރޭޖެއް އެޅުމަށްވެސް ވަނީ ނިންމާފައެވެ.
ފިޝަރީސް މިނިސްޓަރު އަހުމަދު ޝިޔާމް ވިދާޅުވީ، ސަރުކާރުން މަސައްކަތް ކުރަނީ ފިނިކުރި އަދި ގަނޑުކުރި މަސް އެކްސްޕޯޓު ކުރުމުގެ ބަދަލުގައި ރާއްޖޭގައި ޕްރޮސެސްކޮށްފައިވާ މަހުގެ ބާވަތްތައް އެކްސްޕޯޓު ކުރުމަށް ކަމަށެވެ. އެހެންވެ، މި މަސައްކަތުގެ ސަބަބުން، އާ ސަރުކާރުގެ ކުރީ ކޮޅުގައި މިކަން ހާސިލުވާނެ ކަމަށް ވެސް ވިދާޅުވިއެވެ.
