ދިވެހި ގައުމު ހަމަނުޖެހުމެއްގެ ތެރެއަށް ވައްޓާލަން މަސައްކަތް ކުރާ ޕާޓީ އަކަށް ވޯޓު ދިނުމަކީ ހަމަޖެހުމާއި ތަރައްގީ އެދޭ ބަޔަކު ކުރާނެ ކަމެއް ނޫން ކަމަށް ކޮންސްޓްރަކްޝަން މިނިސްޓަރު ޑރ.މުއްތަލިބު ވިދާޅުވެއްޖެއެވެ.

Ads by Asuru

ރައްޔިތުންގެ މަޖިލީހުގެ އިންތިހާބުގެ ވޯޓުލުން ކައިރިވެފައިވާ މި ދަނޑިވަޅުގައި، އެކްސްގައި މިނިސްޓަރު މުއްތަލިބު  ކުރެއްވި ޕޯސްޓެއްގައި ވަނީ ރައްޔިތުންގެ ބޮޑު އަޣުލަބިއްޔަތަކުން ހޮވި ސަރުކާރު ވައްޓާލައި ގައުމު ހަމަނުޖެހުމުގެ ތެރެއަށް ވައްޓާލުމަށް ފާޅުގައި ގޮވަމުންގެންދާ ޕާޓީއަކަށް ވޯޓުލުމަކީ ރާއްޖޭގެ ހަމަޖެހުމާއި ތަރައްގީއަށް އެދޭ އެއްވެސް ރައްޔިތަކު ކުރާނެކަމެއް ނޫން ކަމަށް ވިދާޅުވެފައެވެ.

މިނިސްޓަރު މިފަދައިން ވިދާޅުވީއިރު، ފަސް މަސް ވެސް ނުފުރޭ އާ ސަރުކާރު ވައްޓާލަން ޖެހޭ ކަމަށް ދޭވަހާ މޭރުމަކުން އިދިކޮޅު އެމްޑީޕީގެ ބޭފުޅުން ދަނީ ވާހަކަ ދައްކަވަމުންނެވެ.

އެމްޑީޕީގެ ސްޕެޝަލް އެޑްވައިޒަރު، އިބްރާހީމް މުހައްމަދު ސޯލިހު ވަނީ ރައީސް ޑރ.މުހައްމަދު މުއިއްޒު އަޒުލު ކުރަންވީ ވަގުތު ޖެހިއްޖެ ކަމަށް ވިދާޅުވެފައެވެ.

ތ. ތިމަރަފުށި ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓުގެ ކެމްޕެއިން ޖަލްސާގައި ވާހަކަ ދައްކަވަމުން ސޯލިހު ވަނީ 20 ވަނަ ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ލިބިއްޖެނަމަ ރައީސް މުއިއްޒު އަޒުލު ކުރަން، އަނެއްކާ ވެސް އެމްޑީޕީން މަސައްކަތް ކުރާނެ ކަމަށް ދޭހަކޮށްދޭ މޭރުމަކުން ވާހަކަ ދައްކަވައިފައެވެ.