ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމުގެ ގޮތުން ފެށި ”ކުރަނގި“ އޮޕަރޭޝަންގައި 500އަށް ވުރެ ގިނަ ބިދޭސީންގެ ބަޔޮމެޓްރިކް ޑާޓާ ނަގައިފިއެވެ.
ބަޔޮމެޓްރިކް ޑާޓާގެ ގޮތުގައި 10 އިނގިލީގެ ނިޝާނާއި ފޭޝަލް ރެކޮގްނިޝަން ލިބޭނެ ފޮޓޯ ނަގާނެއެވެ.
މިނިސްޓަރު ވިދާޅުވީ، މި މަސައްކަތުގެ ތެރެއިން ނެގި ޑާޓާ މިހާރު ވަނީ ބިދޭސީ މަސައްކަތްތެރިންގެ މައުލޫމާތު ބަލަހައްޓާ ސިސްޓަމަށް އަޕްލޯޑްކުރެވިފައި ކަމަށެވެ. އަދި ދާދި އަވަހަށް ރާއްޖޭގެ އިތުރު ފަސް ސަރަހައްދެއްގައި ވެސް އެއްފަހަރާ މި މަސައްކަތް ފެށޭނެ ކަމަށް މިނިސްޓަރު ވިދާޅުވިއެވެ.
ބިދޭސީން ގަވައިދަށް ފެއްތުމުގެ މަސައްކަތް ފެށީ މި މަހުއެވެ. މިއީ މޯލްޑިވްސް ޕޮލިސް ސަރވިސްއާއި، ރަށް ރަށުގެ ކައުންސިލުތައް ގުޅިގެން ކުރާ ކަމެކެވެ.
ސަރުކާރުގެ އަމާޒަކީ ގަވައިދާ ހިލާފަށް އުޅޭ ބިދޭސީންގެ މައްސަލަ ތިން އަހަރުގެ ތެރޭގައި ހައްލުކުރުމެވެ.
