ރަށްތަކުގައި ހޮސްޕިޓަލުތައް ތަރައްގީ ކުރުމަށް ކުވެއިތު ފަންޑާއެކު ލޯނު އެއްބަސްވުމެއްގައި ސޮއި ކޮށްފިއެވެ.
ދިވެހިރާއްޖޭގެ ފަރާތުން އެ އެއްބަސްވުމުގައި ސޮއި ކުރައްވާފައި ވަނީ ފިނޭންސް މިނިސްޓަރު ޑރ. މުހައްމަދު ޝަފީގެވެ.
މި އެއްބަސްވުމުގައި ކުވެއިތު ފަންޑުގެ ފަރާތުން ސޮއި ކުރައްވާފައި ވަނީ އެ ފެންޑްގެ އެކްޓިންގ ޑިރެކްޓަރ ޖެނެރަލް ވަލީދު އަލް ބަހަރްއެވެ.
ފިނޭންސް މިނިސްޓްރީން ނެރުނު ބަޔާނެއްގައި ބުނީ ”ސްމޯލް އައިލެންޑްސް ހޮސްޕިޓަލް ޕްރޮޖެކްޓް“ގެ ދަށުން ރާއްޖޭގެ އުތުރާއި ދެކުނުގައި ހިމެނޭ ކުދި ރަށްރަށަށް ބޭނުންވާ ސިއްހީ ހިދުމަތްތައް ފޯރުކޮށްދިނުމާއި އެ ހިދުމަތްތަކުގެ ފެންވަރު ރަނގަޅު ކުރެވިގެންދާނެ ކަމުގައެވެ.
މި މަޝްރޫއުގެ ސަބަބުން، ސިއްހީ ހިދުމަތް ހޯދުމަށް ދަތުރުފަތުރު ކުރުމުގެ ހަރަދުތައް ކުޑަވެ، އެ ހިދުމަތް ލާމަރުކަޒީ އުސޫލުން ފޯރުކޮށްދިނުމަށް މަގުފަހިވާނެ ކަމަށް ވެސް އެ މިނިސްޓްރީން ބުންޏެވެ.
ހޮސްޕިޓަލްތައް ތަރައްގީކުރުމުގެ ތެރޭގައި އިމާރާތްކުރުމުގެ މަސައްކަތްތަކާއި ހޮސްޕިޓަލް އިމާރާތްތަކާއި ހިދުމަތުގެ އިލެކްޓްރޯ ޓެކްނިކަލް މަސައްކަތްތަކާއި ސިއްހީ އާލާތްތަކާއި ފަރުނީޗަރު ފޯރުކޮށްދިނުމާއި ކުރެހުންތަކާއި ބީލަން ލިޔެކިޔުންތައް ތައްޔާރުކުރުމާއި އިމާރާތްކުރުމުގެ މަސައްކަތް ބެލެހެއްޓުމަށް ބޭނުންވާ އިންޖިނިއަރިން ހިދުމަތް އަދި މަޝްރޫއު ތަންފީޒުކުރާ ޔުނިޓު ހިމެނެއެވެ.
