ދިވެހިރާއްޖޭގެ ގައުމީ އެއާރލައިން، މޯލްޑިވިއަން އިން ބަނގުލަދޭޝްގެ ޑާކާއަށް ކުރަމުން އައި ދަތުރުތައް ވަގުތީ ގޮތުން މެދުކަނޑާލައިފިއެވެ.
މޯލްޑިވިއަން އިން ހާމަކޮށްފައިވާ ގޮތުގައި ޑާކާއަށް ކުރާ ދަތުރުތައް މެދުކަނޑާލީ މިއަދުން ފެށިގެންނެވެ. އަދި އަލުން ދަތުރުތައް ފަށާނެ ދުވަހެއް ފަހުން އިއުލާންކުރާނެކަމަށް ވެސް ބުނެފައިވެއެވެ.
މޯލްޑިވިއަނުން މިއަދު ބުނީ ފްލައިޓްތައް ކެންސަލްކުރަން ޖެހުނީ ބަންގްލަދޭޝްގެ ހާލަތު ގޯސްވުމާ ގުޅިގެން، އެ އެއާލައިނަށް ފްލައިޓް އޮޕަރޭޓް ނުކުރެވިގެން ކަމަށެވެ.
އަދި އެކަން ވަރަށް ގާތުން ބަލަމުން އަންނަ ކަމަށާއި މި ދަނޑިވަޅުގައި ފަސިންޖަރުންނަށް އެހީތެރިކަން ފޯރުކޮށްދިނުމަށް މަސައްކަތް ކުރަމުން ދާކަމަށް މޯލްޑިވިއަނުން ވަނީ ބުނެފައެވެ.
މީގެއިތުރުން ފަސިންޖަރުންނާއި ފަޅުވެރިންގެ ސަލާމަތާއި ރައްކާތެރިކަމަކީ މޯލްޑިވިއަނުން އެންމެ ބޮޑު އިސްކަންދޭ ކަންކަމުގައި ބުނެފައިވެއެވެ.
މޯލްޑިވިއަން އިން ވަނީ މިކަމާއި ގުޅޭ މައުލޫމާތު ހޯދުމަށް 1671 އަށް ގުޅުމަށް އެދިފައެވެ. އަދި ޑާކާއިން ދަތުރުކުރާ ފަސިންޖަރުންނަށް +8801621211316 އަށް ގުޅުމަށް އެއާލައިނުން އެދެއެވެ.
މޯލްޑިވިއަނުން ބަންގްލަދޭޝްގެ ވެރިރަށް ޑާކާއަށް ޝެޑިއުލް ދެ ދަތުރުކުރެއެވެ.
ބަންގްލަދޭޝްގައި ވަޒީފާގެ ކޯޓާގެ މައްސަލައިގައި ފެށި ދިގުލައި، އެ ގައުމުގެ ބޮޑުވަޒީރު ޝެއިހު ހަސީނާ ވަނީ މަގާމުން އިސްތިއުފާ ދެއްވައި، ފިއްލަވައިފައެވެ.
