ގާނޫނު އަސާސީން ލިބިދީފައިވާ ހައްގުތައް ކަށަވަރުކޮށްދީ ރައްޔިތުންގެ މަޖިލީހަށް މަތިކޮށްފައިވާ ވާޖިބުތައް އަދާކުރައްވާނެ ކަމަށް މަޖިލީހުގެ ރައީީސް އަބްދުއްރަހީމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން މަޖިލިސް ރައީސް މިހެން ވިދާޅުވީ، މިހާރު އަމަލު ކުރަމުން މިދާ ފެހި ގާނޫނުއަސާސީ، އޭރުގެ ރައީސުލްޖުމްހޫރިއްޔާ މައުމޫން އަބްދުލް ގައްޔޫމު، ތަސްދީގު ކުރެއްވިތާ 16 އަހަރު ފުރުމާއި ގުޅިގެންނެވެ.
އެމަނިކުފާނު ވިދާޅުވީ މުއައްސަސާތައް ޖަވާބުދާރީ ކުރުވައި ރައްޔިތުންގެ މަޖިލީހުގެ މަސްއޫލިޔައްތުތައް މިހާރު އޮތް 20 ރައްޔިތުންގެ މަޖިލީހުން އަދާކުރާނެ ކަމުގެ ޔަގީންކަން ދެއްވާ ކަމަށެވެ.
އަބްދުއްރަހީމް ވިދާޅުވީ ގާނޫނުއަސާސީން ރައްޔިތުންގެ މަޖިލީހަށް މަތިކޮށްފައިވާ ވާޖިބުތައް އަދާކޮށް މުއައްސަސާތައް ޖަވާބުދާރީ ކުރައްވާނެ ކަމަށެވެ.
”ގާނޫނުއަސާސީން އަޅުގަނޑުމެންނަށް ލިބިފައިވާ ހައްގުތައް ކަށަވަރުކޮށްދިނުމުގައި، އަދި ރައްޔިތުންގެ މަޖިލީހަށް މަތިކޮށްފައިވާ ވާޖިބުތައް އަދާކޮށް، މުއައްސަސާތައް ޖަވާބުދާރީ ކުރުމުގައި މަޖިލީހުގެ މަސްއޫލިއްޔަތު މި މަޖިލީހުން އަދާކުރާނެ ކަމުގެ ފުރިހަމަ ޔަގީންކަން ދިވެހި ލޮބުވެތި ރައްޔިތުންނަށް އަރުވަން،“ މަޖިލީހުގެ ރައީސް ވިދާޅުވިއެވެ.
މިހާރު އަމަލުކުރަމުން އަންނަ ގާނޫނުއަސާސީ ތަސްދީގު ކުރެއްވީ 2008 ވަނަ އަހަރުގެ އޮގަސްޓްމަހުގެ ހަތް ވަނަ ދުވަހުއެވެ.
