ހަސަން ކުރުސީގެ ނަމުގައި ހަދާފައިވާ ފޭކު އެކްސް އެކައުންޓަކުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ އަބުރު ކަތިލުމަށް، އެމަނިކުފާނު ބަދުއަހުލާގީ އަމަލު ހިންގާ ކަމަށް ތުހުމަތުކޮށް ދައުރު ކުރި ވީޑިއޯއަކީ ފޭކު ވީޑިއޯއެއްކަން ހާމަވެއްޖެއެވެ.
މި ވީޑިއޯ އާންމުކުރި ކުރުސީގެ އެކައުންޓުން ވަނީ އެއީ ފޭކު ވީޑިއޯއެއް ކަމަށް އިއުތިރާފުވެ، މައާފަށް ވެސް އެދިފައެވެ.
އެ އެކައުންޓުން އާއްމު ކުރި ބަޔާނެއްގައި ވަނީ ޑރ. ޝަހީމްގެ އިތުރުން އޭނާގެ އާއިލާގެ ކިބައިން މާފަށް އެދޭކަމަށް ބުނެފައެވެ.
ކުރުސީ ވަނީ މިކަމުން ޝަހީމް އަށާއި އޭނާގެ އާއިލާއަށް ކުރިމަތިވެދާނެ ގެއްލުމަކަށް ހިތާމަކުރާކަމަށާއި، ނުކުރާ ކަމެއްގެ އިލްޒާމު އެއްވެސް މީހެއްގެ ބޮލުގައި އެޅުވިގެން ނުވާނެ ކަމަށްވެސް ބުނެފައެވެ.
ޑރ.ޝަހީމް ބަދުނާމު ކުރުމަށް ކުރުސީ އެކައުންޓުން ވަނީ ޝަހީމް ހާސިލު ކުރެއްވި ޕީއެޗްޑީގެ ސައްހަ ކަމާމެދު ވެސް ސުވާލު އުފައްދާފައެވެ.
ނަމަވެސް ޑރ.މުހައްމަދު އިޔާޒު ފަދަ، ދީނީ އިލްމުވެރިން ވަނީ އެކަން ދޮގުކޮށް، މިނިސްޓަރު ޝަހީމް ދިފާއު ކުރައްވައި، އެމަނިކުފާނުގެ ޕީއެޗްޑީއާމެދު ސުވާލު އުފެއްދުމުގެ ޖާގައެއް ނެތް ކަމަށް ވިދާޅުވެފައެވެ.
އިސްލާމީކް މިނިސްޓަރު ޑރ ޝަހީމް އަކީ ފުރައްސާރަކޮށް ހަގީގަތާ ހިލާފު އިލްޒާމުތައް އަޅުވައިގެން ފަހަތަށް ޖެއްސޭނެ ބޭފުޅެއްނޫން ކަމަށް މަޖިލީހުގެ ރައީީސް އަބްދުއްރަހީމް ވެސް ވަނީ ވިދާޅުވެފައެވެ.
އަބްދުއްރަހީމް ވިދާޅުވީ އެ އަށްވުރެ ޑރ.ޝަހީމުގެ އަޒުމު ވަރުގަދަވާނެ ކަމަށާއިށ އެއީ މިހާތަނަށް ދިވެހިރާއްޖެ ދުށް އެންމެ ގާބިލު، އަދި އެންމެ ހިންގުންތެރި އިސްލާމިކް މިނިސްޓަރު ކަމަށެވެ.
