ޢާއިލީ ވެއްޓެއްގައި އުފާވެރިކަމާއެކު ދިރިއުޅުމަކީ ކޮންމެ މީހެއްގެ ޙައްޤެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ޚުތުބާގައި ވަނީ އާއިލީ ގުޅުން ބަދަހި ކުރުމުގެ މަތިވެރިކަމާއި ފައިދާއަށް އަލިއަޅުވާލާފައެވެ.
އާއިލީ ވެއްޓެއްގައި އުފާވެރިކަމާއެކު އުޅުމުގެ ހައްގު ގެއްލުމަކީ އިންސާނީ ކުރި މަގަށް ނޭދެވޭ އަސަރު ކުރާނެ ކަމެއް ކަމަށް ޚުތުބާގައި ވަނީ ބުނެފައެވެ.
ހުތުބާގައި ބުނީ އިސްލާމްދީނުގައި އިންސާނީ ނަސްލަށް ދެވިފައިވާ މަތިވެރިކަމާއެކު، އަޅުކަންކުރުމާއި ދުނިޔެ ޢިމާރާތްކުރުމުގެ މަސްއޫލިއްޔަތު އިންސާނުންނާއި ހަވާލުކޮށްފައިވާ ކަމަށެވެ.
މި މަޤްޞަދު ޙާޞިލުކުރުމަށް، ޢާއިލާގެ ކޮންމެ މެންބަރަކުމެ ގުޅުންތައް ބަދަހިކޮށް ބާރުވެރިކުރުމަށް މަސައްކަތްކުރަންޖެހޭ ކަމަށް ޚުތުބާގައި ބުނެފައި ވެއެވެ.
އަދި ވަރުގަދަ ޢާއިލާތަކަކުން އެކުލެވޭ މުޖުތަމަޢަކީ މާތް ރަސްކަލާނގެ ޝިޢާރުތައް މަތިވެރިކޮށް، މުޖުތަމަޢު ބަލަހައްޓައި ދިފާޢުކުރާނެ ޤާއިދުންނާއި ފަހުލަވާނުން އުފެދޭނެ މުޖުތަމަޢަކަށް ވާނެ ކަމަށް ޚުތުބާގައި ބުންޏެވެ.
އަދި ޢާއިލާގެ ތެރޭގައި އިޙްތިރާމްކުރުމާއި އަގުވަޒަންކުރުން އޮންނަންޖެހޭއިރު، ބިނާކުރަނިވި ފާޑުކިޔުންތަކާއި ގުޅުންތައް ޤާއިމުކުރެވެންޖެހޭ ކަމަށްވެސް ވަނީ ބުނެފައެވެ.
އެކަކު އަނެކަކުގެ އަޑުއަހައި، އިޙްސާސްތަކާއި ބޭނުންތައް އިޙްތިރާމާއެކު ހިއްސާކުރުމުގެ މާޙައުލެއް އުފެއްދުމަކީ މުހިންމު ކަމެެއްކަންވެސް ޚުތުބާގައި ފާހަގަކުރައްވާފައި ވެއެވެ.
އަދި ކެތްތެރިކަމާއި ތަޙައްމަލުކުރުމަކީ ބިނާކުރަނިވި ގޮތެއްގައި ކޯޅުންތަކާއި މައްސަލަތައް ޙައްލުކުރުމަށް އެހީތެރިވެދޭ ކަމެއްކަން ޤަބޫލުކޮށް، ޢާއިލާގެ އެހެން މެންބަރުންނަށް ސާފުކޮށްދީ ވިސްނައިދޭންޖެހޭ ކަމަށްވެސް ޚުތުބާގައި ވެއެވެ.
