ކުރީގެ ރައީސް ޔާމީން އަބްދުލްގައްޔޫމްގެ ”ސިޔާސީ ގުއިރޯނުގައި“ ދެން ޖެހިވަޑައިނުގަންނަވާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް މިރޭ ވިދާޅުވެއްޖެއެވެ.
މިނިސްޓަރު މިހެން ވިދާޅުވިއިރު، މަޖިލީހުގެ ރައީސް، އަދި ރައީސް ޔާމީންގެ ކުރީގެ ސިޔާސީ އެންމެ ގާތް މިތުރު، އަބްދުއްރަހީމާ ޔާމީން ގެންދަވަނީ އެއްބޭފުޅަކު އަނެއް ބޭފުޅަކަށް ބަހުގެ ހަމަލާތައް ރައްދު ކުރައްވަމުންނެވެ.
ފޭސްބުކްގައި ކުރެއްވި ޕޯސްޓެއްގައި ފައިސަލް ވިދާޅުވީ، އޭނާގެ ބައްޕަ އަދި ރައްޔިތުންގެ މަޖިލީހުގެ ރައީސް އަބްދުއްރަހީމް، ރައީސް ޔާމީން އަށް މެދުކެނޑުމެއްނެތި 20 އަހަރު ސިޔާސީ ”އަޅު މަސައްކަތް“ އެއްވެސް ވަރުބަލިކަމެއް، ފޫހިކަމެއްނެތި ކޮށްދިންކަން މި ދިވެހި ގައުމު ހެކިވާނެ ކަމަށެވެ.
”އޭރަކު އަޅުގަނޑުގެ ބައްޕަގެ ތަޢުލީމެއް މަނިކުފާނަށް މުހިންމު ނުވިއެވެ. 2018 ގައި މަނިކުފާނާއި މަނިކުފާނުގެ އަނބިކަބަލުން ހެއްދެވި ސިހުރުގެ ތެރޭގައި މުޅި ޕީޕީއެމްގެ އޮޑި ފަރަށް އެރީ އަޅުގަނޑުގެ ބައްޕަ ހިމެނޭހެން ޕީޕީއެމް ގެ ލީޑަރޝިޕްގެ ގިނަބަޔަކު ދުރަށް ޖައްސައި، މަނިކުފާނުގެ އަންހެނުންލައްވައި ޕީޕީއެމް ހިންގުވައި މުލިއާގޭގައި “ ސިހުރުތަށި“ ދުއްވަން އުޅުމުގެ ނަތީޖާއެއްގެ ގޮތުންނެވެ. ހަޤީޤަތުގައިވެސް އެ އިންތިޚާބުގައި މަނިކުފާނު އަތުގައި މަދީ އަލާއުއްދީނުގެ ވޮއްގަނޑާއި އުދުހޭ މުސައްލަ ނެތުމުންނެވެ.“ ފައިސަލް ފޭސްބުކްގައި ކުރެއްވި ޕޯސްޓުގައި ވިދާޅުވިއެވެ.
2019 ގައި ރައީސް ޔާމީން ޤަޞްތުގައި ޕީޕީއެމްގެ މަޖިލީސް މެންބަރުން ފެއިލްކޮށްލި ކަމަށް މިނިސްޓަރު ތުހުމަތު ކުރެއްވިއެވެ.
އެއީދުރާލާރާވައިގެން އެމީހުން އަޅުވެތިކަމުގައި ބޭތިއްބުމުގެ ކެހިވެރި ނިޔަތުގައި ޔާމީން ކުރެއްވި ކަމެއް ކަމަށް އޭނާ ވިދާޅުވިއެވެ.
އެހާލަތުގައި ޔާމީން ދޫކޮށް ޕާޓީގެ އިސް ގިނަ ބަޔަކު ދިޔުމުން، ހުރިހާ ތަކުލީފެއް އުފުލަން ކެތްތެރިކަމާއެކު ހުންނެވީ ބައްޕަ އަބްދުއްރަހީމް ކަމަށް ފައިސަލް ވިދާޅުވިއެވެ.
”2019 ނޮވެމްބަރު މަހުގެ 29 ވަނަ ދުވަހު، ވޮޑަމުލާމައްސަލައިގައި މަނިކުފާނަށް ކްރިމިނަލް ކޯޓުން 5 އަހަރު ދުވަހުގެ ޖަލު ހުކުމް އިއްވުމުން، ދެ ޕާޓީގެ ސިޔާސީ މަސައްކަތް ކުރަން 24 ގަޑިއިރު ގަނަތެޅުނީ އަޅުގަނޑުގެ ބައްޕައެވެ. އެ ހުކުމުން ސަލާމަތްވެ، އަހަރެއްހާ ދުވަސްފަހުން މަނިކުފާނު އެނބުރި އައިއިރު، ޕާޓީ ގެ ސިޔާސީ ހަރަކާތް މެކުހަށް ޖަހައި، އެންމެން ގޮވައިގެން ދުވާލު ހަތަރުދަމު، ސަރުކާރު ޒިންމާދާރުކުރުވާ އަވައްޓެރީންނާއި ދުރުތިބީންގެ ދޮޅިދަށަން އަތްލައި މަނިކުފާނުގެ ހައްޤުގައި އަވަދިވަމުން ދިޔައީ އަޅުގަނޑުގެ ބައްޕަކަން މި ދިވެހި ޤައުމު ހެކިވާނެއެވެ.“
ފައިސަލް ވަނީ ރައީސް ޔާމީން މިނިވަންވެވަޑައިގެން، ޖަލުން އެނބުރި ވަޑައިގެންނެވިއިރު، ޕީޕީއެމް/ޕީއެންސީގެ ކޯލިޝަނުން ކާނިވަލުގައި ބޭއްވި މާސިންގާ ޖަލްސާއެއްގައި، ޔާމީން ޖަލުގައި ހުންނަވަނިކޮށް ކޮށްދެއްވާފައިވާ މަސައްކަތުގެ ސަބަބުން އަބްދުއްރަހީމަށް އިއްވެވި ސަނާއާއި ކުރި އިތުބާރުގެ ވާހަކަތަކުގެ މަތީން މިހާރު ހަނދާން އެބަހުރި ތޯ ވެސް އައްސަވާފައެވެ. އަދި އެކަމާ ގުޅޭ ވީޑިއޯ އެއްވެސް ފައިސަލް ހިއްސާ ކުރެއްވިއެވެ.
”އެ ބޮޑު މާސިންގާ ކޯލިޝަން މަނިކުފާނުގެ ޣައިރު ހާޒިރުގައި ބަލަހައްޓަން މަނިކުފާނު ހަވާލު ކުރީ އެއްވެސް ޢިލްމެއް، ހިލްމެއް ނެތް މީހަކާ ތޯއެވެ؟ އެއިރު ހަމަ ބަރާބަރު ދެއްތޯއެވެ؟“ ފައިސަލް ސުވާލު އުފެއްދެވިއެވެ.
މިނިސްޓަރު ފައިސަލް ވިދާޅުވި ގޮތުގައި، 2023 ވަނަ އަހަރުގެ ރިޔާސީ ޓިކެޓުގައި މަނިކުފާނުގެ ނަން ނުބޭއްވުމަކީ އެމްޑީޕީން ކުރި ކަމެކެވެ.
އަދި އެއީ އެމްޑީޕީގެ ކެންޑިޑޭޓު ރައީސް ނަޝީދުގެ ކެނޑިޑެސީ ރައީސް ޔާމީން އިސްވެ ހުންނަވައި، 2013 ގައި ދުއްވާލުމުގެ ބަދަލުގައި ކުރި ކަމެއް ކަމަށް ވެސް މިނިސްޓަރު ވިދާޅުވިއެވެ.
”މިހެން ވާނެކަން އިނގިހުރެ، އިދިކޮޅު އެންމެ ބޮޑު ކޯލިޝަން އިން ކެނޑިޑޭޓަކު ނުނެރި މުޅި ޤައުމު އެމްޑީޕީ އަތަށް ދެވަނަ ދައުރަކަށް ދޭންމަނިކުފާނު ނިންމީ މަނިކުފާނަށް ކުރިމަތިނުލެވޭ ނަމަ އިންތިޚާބު ބޮއިކޮޓް ކުރުމުގެ ކެހިވެރި ނިޔަތުގައެވެ.“ ފައިސަލް ވިދާޅުވިއެވެ.
ތިމާ އަށް ނުލިބުނު މޮޅެއް އެހެން މީހަކަށް ލިބުމަށް ނޭދޭތީ މުޅި އިދިކޮޅު ނުހަނު ނިކަމެތި ކަމާއެކު އިތުރު ފަސް އަހަރު މަގުމަތީގައި ބޭއްވުމަށް ރައީސް ޔާމީން ނިންމެވި ހިސާބުން، އެ މަނިކުފާނުގެ ލީޑަރޝިޕު ފެއިލްވިކަން ހިސާބުޖަހަން ޔާމީނަށް ނޭނގުމަކީ ހަގީގަތް ކަމަށް ވެސް އޭނާ ވިދާޅުވިއެވެ.
ޕާޓީ އަކީ މަނިކުފާނުގެ ތަރިކަ މުދަލެއްކަމަށް ހިތައި، ޕާޓީ އަށް ލިބުނު ފައިސާގެ އެކި މިންވަރުގެ އެހީ އިން ބޮޑު ބައެއް 2013 އިން ފެށިގެން އަމިއްލަފުޅު އެކައުންޓްތަކަށް ލައްވަމުން ދިޔައީ ޕީޕީއެމް އާންމު މެމްބަރުންނަކީ މޮޔައިން ކަމަށް ދެކޭތީތޯ ވެސް މިނިސްޓަރުގެ ޕޯސްޓުގައި ސުވާލު އުފެއްދެވިއެވެ.
”އަޅުގަނޑުގެ ބައްޕަ އާއިއަދި މިއަދުގެ ޤައުމުގެ ރައީސް ޑރ މުޢިއްޒުގެ ހިތްވަރާއި ކެރުން ނެތްނަމަ، އަދިވެސް އަޅުގަނޑުމެން ތިބެން ޖެހޭނީ މަގުމަތީގައެވެ. މި ޤައުމު އޮންނާނީ އޮޔާގޮސް ލޯމަތިން ގެއްލިފައެވެ.“
ޑރ.މުހައްމަދު މަލީހު ޖަމީލާއި، ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލާއި، ކުރީގެ ޕޮލިސް ކޮމިޝަނަރު ހުސެން ވަހީދުއާއި ސިފައިންގެ ބަޑި ގުދަނުގެ ކުރީގެ ވެރިޔާ އަހުމަދު ފަޔާޒު އަލީ ރިޒާ (ޕާޕާ) ގޮވައިގެން އިންނަވާ އެއީ ތެދުވެރިންކަމަށް ރައީސް ޔާމީން ވިދާޅުވަމުން ދާއިރު އެއިން ކޮންމެ މީހަކީ އެމަނިކުފާނު މި ދުނިޔެއިން ނައްތާލަން އުޅުނު މީހުން ކަމަށް ކުރިން ވިދާޅުވީ ވެސް ޔާމީން ކަމަށް މިނިސްޓަރު ވިދާޅުވިއެވެ. ފައިސަލް ވަނީ އެ ބޭފުޅުން ކިޔަވައިގެން ތިއްބެވުމުން ގައުމަށް ކޮށްދިން ހިދުމަތެއް އޮތްތޯ ވެސް ސުވާލު ކުރައްވައިފައެވެ.
ފައިސަލް ވިދާޅުވީ އޭނާއާއި، ބައްޕަ އަބްދުއްރަހީމް ވެސް ރައީސް ޔާމީންގެ ސިޔާސީ ގުއިރޯނުގައި ދެން ނުޖެހޭނެ ކަމަށެވެ.
އަދި ރައީސް ޔާމީނަށް މި ގައުމުގެ ހަޒާނާއަށް އަތްބޭނުމަށް ޖާގައެއްވެސް ނުދެއްވާނެ ކަމަށް ވެސް ފައިސަލް ވިދާޅުވިއެވެ.
