ވެރިރަށް މާލެއާއި ވިލިމާލެއާއި ގުޅިފަޅާއި ތިލަފުއްޓާ ދެމެދު އަޅާ ތިލަމާލެ ބްރިޖުގެ މަސައްކަތް ކުރިއަށްދާ ގޮތް، އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު ބައްލަވާލައްވައިފިއެވެ.
ތިލަމާލެ ބްރިޖު މަޝްރޫއު ހިނގަމުންދާ ސަރަހައްދަށް އިއްޔެ ޖައިޝަންކަރު ކުރެއްވި ޒިޔާރަތުގައި ފޮރިން މިނިސްޓަރު މޫސާ ޒަމީރާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު މުއްތަލިބާއި އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު ވެސް ބައިވެރިވެވަޑައިގެންނެވިއެވެ.
މި ޒިޔާރަތަށް ފަހުގައި ޖައިޝަންކަރު އެކްސްގައި ކުރެއްވި ޕޯސްޓެއްގައި ވިދާޅުވީ އިންޑިއާގެ އެހީތެރިކަމާ އެކު ކުރިއަށްދާ ތިލަމާލެ ބްރިޖު މަޝްރޫއު ފުރިހަމަވުމާ އެކު އިގްތިސާދަށް ކުރިއެރުން ލިބިގެންދާނެ ކަމަށެވެ.
އެމްޑީޕީގެ ސަރުކާރުގައި ފަށައި، ވަރަށް ބޮޑަށް މަޑު ޖެހިގެން ދިޔަ މި މަޝްރޫއުގެ 40 އިންސައްތަ މަސައްކަތް މިހާރު ވަނީ ނިންމާލާފައެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން މި މަޝްރޫއުގެ ދުވެލި އަވަސްކޮށް ބްރިޖުގެ %29 މަސައްކަތް ވަނީ ނިމިފައެވެ.
