”ސްޓްރެޓެޖިކް ޕްލޭނިންގ ވޯކްޝޮޕް 2024“ ގެ ދަށުން މިފްކޯގެ އެފިޝެންސީ އެކްސަސައިޒެއް ކުރިއަށް ގެންގޮސްފިއެވެ.
މިފްކޯ އިން ބުނީ، އެ ކުންފުންޏަކީ ފައިދާގައި ހިންގައި، ދައުލަތަށް ޑިވިޑެންޑް ދައްކާ ކުންފުންޏަކަށް ހެދުމަށް ކުރާ މަސައްކަތުގެ ތެރެއިން މި މަހުގެ 7 އިން 8 އަށް ކަނޑުއޮތްގިރި ފިޝް ވިލެޖުގައި މި ތަމްރީނު ކުރިއަށް ގެންގޮސްފައިވާ ކަމަށެވެ.
މިފްކޯގެ މެނޭޖުމެންޓާއި އޮޕަރޭޝަނަލް މުވައްޒަފުންނަށް އަމާޒުކޮށް ހިންގި މި ތަމްރީނުގައި އެކުންފުނީގެ 60 އަށް ވުރެ ގިނަ މުވައްޒަފުން ވަނީ ބައިވެރިވެފައެވެ.
ދެ ދުވަހުގެ މުއްދަތަށް ކުރިޔަށް ގެންދިޔަ ސެޝަންތަކުގައި ކުންފުނީގެ ޑިޕާޓްމެންޓުތަކުގެ މަސައްކަތްތައް ތަރުތީބު ކުރެވިފައިވާ ގޮތުގެ ޕްރެޒެންޓޭޝަންތައް ވަނީ ހުށަހަޅާފައެވެ.
މިފްކޯ އިން ބޭއްވި އެފިޝެންސީ އެކްސަސައިޒްގެ ތެރެއިން: ފޮޓޯ/ މިފްކޯ
އަދި ޑިޕާޓްމެންޓުތަކުގެ މަސައްކަތްތައް އިތުރަށް ހަރުދަނާ ކުރުމަށާއި، އިސްރާފު ކުޑަ، ފެންވަރު ރަނގަޅު ހިދުމަތް ދެވޭނެ އައު ގޮތްތަކާއިމެދު ގްރޫޕު މަސައްކަތްތައް ވަނީ ކުރިއަށް ގެންގޮސްފައެވެ.
އޭގެ ތެރޭގައި ކުންފުނީގެ ”އިމޭޖު“ ރަނގަޅު ކުރުމަށް ކުރެވިދާނެ ކަންތައްތަކާއި، ޓެކްނިކަލް އަދި އިންޖިނިއަރިންގ މަސައްކަތްތައް ތަރުތީބު ކުރާނެ އައު ގޮތްތަކާއި، ރިކަރަންޓު ހަރަދުތައް ދެނެގަތުން ހިމެނެއެވެ. މީގެ އިތުރުން މުސާރައާއި، ތެލާއި އެހެނިހެން ހިންގުމުގެ ހަރަދުގެ ތެރޭގައި ކުންފުންޏަށް ގެއްލުންވާ ގޮތްތައް ބަލައި، އެކަންކަމަށް ދާއިމީ ހައްލު ގެންނާނެގޮތްތަކާއި މެދު ވަނީ މަޝްވަރާކުރެވިފައެވެ.
މިފްކޯއިން ކުރިއަށް ގެންދިޔަ އެފިޝެންސީ އެކްސަސައިޒްގެ ތެރެއިން: ފޮޓޯ/ މިފްކޯ
ވަކިން ހާއްސަކޮށް ކުންފުނީގެ ޕްރޮކިއުމެންޓް ފަންކްޝަން މިހާރު އޮތް ގޮތާއި ބަލްކް ޕްރޮކިއުމެންޓް ނިޒާމް ހިނގާ ގޮތާއި، އެ ނިޒާމުގައި ހުރި ފައިދާތަކާއި ގެއްލުންތަކުގެ މައްޗަށް މަޝްވަރާ ކުރެވުނެވެ.
މިފްކޯ އެފިޝެންސީ އެކްސަސައިޒްގައި އެ ކުންފުނިން މިހާރު އުފައްދާ ކަނޑުމަހުގެ ބާވަތްތައް ބައިނަލްއަގްވާމީ ބާޒާރުގައި އިސްތިހާރުކޮށް ވިއްކުމަށް ގެންގުޅޭނެ އައު މާކެޓިން ޓެކްނިކްތަކާއި، އައު މާކެޓްތައް ހޯދުމާއި، ކޮލެޓީ ކޮންޓްރޯލް ކުރުމުގައި ގެންގުޅޭ މިންގަނޑުތަކާއިމެދުވެސް މަޝްވަރާ ވަނީ ކޮށްފައެވެ.
އަދި ވެސެލް މޫވްމަންޓް އޮޕަރޭޝަން ކުރިއަށް ގެންދާ ގޮތާއި ލޯކަލް ޕްރޮޑަކްޓްތަކާއި، އަލަށް ކުރެވިދާނެ ވިޔަފާރިތަކާ ގުޅޭގޮތުންވެސް ވަނީ ފުޅާ ދާއިރާއެއްގައި ތަފާތު އެކި ޕްރެޒެންޓޭޝަން ފެނިގެން ގޮސްފައިވެއެވެ.
މި އެކްސަސައިޒްގައި މިފްކޯގެ ސައިޓްތަކުގެ އިސް ވެރިންގެ އިތުރުން އިންޖިނިއަރުން ބައިވެރިވެފައިވާއިރު، ކަނޑު މަހުގެ ރިޖެކްޝަން ހުންނަ މިންވަރާއި ފިޝް ކަލެކްޝަން އަދި އޮޕަރޭޝަންގެ ކަންކަން ހަރުދަނާކުރުމަށް މަސް ކިރާ ވަގުތުން ފެށިގެން އެކްސްޕޯޓް ޕްރޮސެސް ނިމެންދެން މޮނިޓަރިން މެކޭނިޒަމެއް ތައާރަފް ކުރުމަށްވެސް ވަނީ މަޝްވަރާކޮށްފައެވެ.
މިފްކޯގެ އެފިޝެންސީ އެކްސަސައިޒްގެ ތެރެއިން
އެގޮތުން ރިޖެކްޝަނާ ގުޅޭގޮތުން މައުލޫމާތު ފޯރުކޮށްދިނުމާއި ހޭލުންތެރިކުރުމުގެ ޕްރޮގްރާމްތައް ހިންގުމަށް މަޝްވަރާކުރެވުނެވެ.
މިފްކޯގެ އަމާޒަކީ އެކުންފުނީގެ އެފިޝަންސީ އެކްސަސައިޒްގެ ތެރެއިން އަހަރެއްހާ ދުވަހުގެ ތެރޭގައި ކުންފުންޏަކީ ފައިދާގައި ހިނގާ އަދި ދައުލަތަށް ޑިވިޑެންޑު ދައްކާ ކުންފުންޏަކަށް ބަދަލުކުރުން ކަމަށް އެ ކުންފުނިން ބުނެއެވެ.
މިފަދަ އެކްސަސައިޒެއް މިފްކޯގައި ކުރިއަށް ދިޔައިރު، އެ ކުންފުންޏަކީ ރައީސް ޑރ.މުހައްމަދު މުއިއްޒު ގެންގުޅުއްވާ އެސްއޯއީތައް ރިފޯމް ކުރުމުގެ އެޖެންޑާގެ ދަށުން އެންމެ ގިނަ މަސައްކަތްތަކެއް މިހާރުވެސް ކޮށްފައިވާ ކުންފުންޏެވެ.
