މިއަދު ފާހަގަކުރާ ގައުމީ ދުވަހާ ގުޅިގެން ބޭއްވި ރަސްމީ ޖަލްސާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވި ތަގުރީރު ފުރިހަމަކަން ފާހަގަކުރައްވައި ރައީސް މައުމޫން އަބްދުލްގައްޔޫމް އެމަނިކުފާނަށް މަރުހަބާ ވިދާޅުވެ، ތައުރީފު ކުރައްވައިފިއެވެ.
ރައީސް މައުމޫން މިއަދު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، ރައީސް މުއިއްޒު މިއަދު އިއްވެވީ، ބާރު ގަދަ، ”އިންސްޕިރޭޝަނަލް“ ތަގުރީރެއް ކަމަށެވެ.
ރައީސް މައުމޫން ކުރެއްވި އިތުރު ޕޯސްޓެއްގައި ވިދާޅުވީ ގައުމީ ދުވަހުގެ ރަސްމީ ޖަލްސާގައި ދިވެހި ވަންތަކަމަށްޓަކާ ފަހުރުވެރިވާން ޖެހޭ ވަރަށް ގިނަ ކަންތައްތަކެއް ފެނުމުން ވަރަށް އުފާކުރައްވާ ކަމަށެވެ.
އަދި ހަމަ އެއާއެކު ވަރަށްގިނަ ފިރިހެން ބޭފުޅުން ރައީސުލްޖުމްހޫރިއްޔާގެ އަނބިކަނބަލުންނާ ސަލާމް ނުކުރެއްވިތަން ފެނުމުން ވަރަށް ދެރަވި ކަމުގައި ވެސް ވިދާޅުވިއެވެ.
މިއަދު ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވަނީ ކަސިޔާރު ފިކުރީ ރާޅުތަކުން ގައުމުގެ އެކި ޖީލުތަކުގެ ހިތްތަކާއި ވިސްނުންތައް ސަލާމަތްކުރަން ބުރަ މަސައްކަތްތަކެއް ކުރަން ޖެހޭކަމުގައި ފާހަގަކުރައްވާފައެވެ.
އަދި މިކަމުގައި ކޮންމެ ބެލެނިވެރިއެއް، ކޮންމެ މުދައްރިސެއް އަދި ކޮންމެ ރައްޔިތަކުމެ އިސްނެންގެވުމަށް އެމަނިކުފާނު އިލްތިމާސްކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވާފައިވަނީ ދިވެހި ގައުމުގެ ޤައުމިއްޔަތު ހިމާޔަތްކޮށް އިޔާދަކުރުމަށް ޢަޒުމު ކަނޑައަޅާ އެންމެން އެކަތިގަނޑަކަށްވެ މަސައްކަތްކުރުމަށް ބާރުއަޅުއްވަމުންނެވެ.
