ޕްރޮސެކިއުޓަރ ޖެނެރަލް(ޕީޖީ)ގެ މަގާމަށް ބޭފުޅަކު އައްޔަނު ކުރުމަށް ބުދަ ދުވަހު ރައްޔިތުންގެ މަޖިލީހުގެ ޖަލްސާއެއް ބާއްވަން ނިންމައިފިއެވެ.
ރައްޔިތުންގެ މަޖިލިސް މިވަގުތު އޮތީ ޗުއްޓީގައި އޮތްއިރު މައުލޫމާތު ލިބިފައިވާ ގޮތުގައި ޕްރޮސިކިއުޓާ ޖެނެރަލްގެ މަގާމަށް ބޭފުޅަކު އައްޔަނު ކުރުމަށް ޖަލްސާއެއް ދައުރުން ބޭރުން ބޭއްވުމަށް ހަމަޖެހިފައިވަނީ ބުދަ ދުވަހުގެ ރޭއެވެ.
ޕީޖީގެ މަގާމު ހުސްވީ އެ މަގާމުގައި ހުންނެވި ހުސައިން ޝަމީމް މަގާމުން ވަކިކުރުމަށް ރައްޔިތުންގެ މަޖިލީހުން ފާސްކުރުމާ ގުޅިގެންނެވެ.
ޕީޖީ ޝަމީމް މަގާމުން ވަކިކުރަން ރައްޔިތުންގެ މަޖިލީހުން ފާސްކޮށްފައިވަނީ އޭނާ މަގާމުން އިސްތިއުފާ ދެއްވާފައިވާކަން ޕީޖީގެ އޮފީހުން ހާމަކޮށްފައިވަނިކޮށެވެ.
ޕްރޮސިކިއުޓާ ޖެނެރަލްގެ ގާނޫނުގައި ބުނެފައިވަނީ ޕްރޮސިކިއުޓާ ޖެނެރަލްގެ މަގާމު ހުސްވާތާ 30 ދުވަހުގެ ތެރޭގައި ބޭފުޅަކު އައްޔަނު ކުރަންވާނެ ކަމަށެވެ.
ޕްރިސިކިއުޓާ ޖެނެރަލްގެ މަގާމަށް ކުރިމަތިލާ ފަރާތްތަކުގެ ތެރެއިން ރައީސުލްޖުމްހޫރިއްޔާއަށް ފެނިވަޑައިގަންނަވާ ނަންތައް ވަނީ ރައްޔިތުންގެ މަޖިލީހަށް ފޮނުވާނެއެވެ. އަދި މަޖިލީހުން ރުހުން ދޭ ބޭފުޅަކު އެ މަގާމަށް އައްޔަނު ކުރިކަމުގެ ލިޔުން އަރުވާނީ ރައީސުލްޖުމްހޫރިއްޔާއެވެ.
