ހ. ދޫހިމެރިގޭގައި އިއްޔެ ހިނގި އަލިފާނުގެ ހާދިސާގެ ސަބަބުން އާއްމުންނަށް ގެއްލުމެއް ލިބިދާނެތީ، އެތަން ތަޅާލުމުގެ މަސައްކަތް ފަށައިފިއެވެ.
ލޯކަލް ގަވަމަންޓް މިނިސްޓަރު އާދަމް ޝަރީފު އުމަރު ވިދާޅުވީ، އަލިފާނުގެ ހާދިސާ ހިނގި އިމާރާތުގެ ސަބަބުން އާއްމުންނަށް ނުރައްކަލެއް ކުރިމަތިވެދާނެ ކަމަށްޓަކައި އެތަން ތަޅާލުމުގެ މަސައްކަތް ލޯކަލް ގަވަމަންޓް މިނިސްޓްރީން ފަށާފައިވާ ކަމަށެވެ.
މިނިސްޓަރު ވިދާޅުވީ އިމާރާތް ތަޅާލުމުގެ މަސައްކަތް ތިން ހަތަރު ދުވަހުގެ ތެރޭގައި ނިންމައިލެވޭނެ ކަމަށް ބެލެވޭ ކަމަށެވެ.
އިއްޔެ އަލިފާނުގެ ހާދިސާ ހިނގީ ދޫހިމެރި ގޭގައި ހުންނަ ގާމަގު ނަމަކަށް ކިޔާ ކެފޭގެ ބަދިގޭގައެވެ.
ތިން ފަންގިފިިލާއަށް ހަދާފައިވާ އެ އިމާރާތުގެ މަތީ ފަންގިފިލާތައް ހަދާފައި ވަނީ ދަނގަޑު ޓިނުންނެވެ.
އިއްޔެ ހިނގި އަލިފާނުގެ ހާދިސާގައި 57 މީހުން ހާލުގައި ޖެހުނު ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުންޏެވެ.
އެ އޮތޯރިޓީން ބުނީ ހާލުގައި ޖެހުނު މީހުންގެ ތެރޭގައި 37 ދިވެހިންނާއި 20 ބިދޭސީން ހިމެނޭކަމަށެވެ.
އެންޑީއެމްއޭ އިން ވަނީ ހާލުގައި ޖެހުނު މީހުންނަށް އިންސާނީ އެހީތެރިކަން ފޯރުކޮށްދީފައެވެ.