ބަރުދަން ލުއި ކުރުމަށް މަސައްކަތް ކުރާއިރު، ކެއުމުގައި ބޭނުންކުރާ ތަކެއްޗާމެދު ސަމާލުވާން ޖެހެއެވެ.
މިގޮތުން ތިމާގެ ޑައިޓަށް ކޮންމެ ދުވަހަކު ވެސް ފެހި އާފަލެއް އިތުރު ކުރުމަކީ ބަރުދަން ލުއި ކުރުމަށް އެހީތެރިވެދޭނެ ކަމެކެވެ. ފައިދާއިން ފުރިގެންވާ މި މީރު މޭވާގައި ގިނަ މިންވަރަކަށް ފައިބަރ އެކުލެވިގެންވެއެވެ. އަދި މިއީ ލޯ-ކެލެރީ މޭވާއެއް ކަމުން، އާފަލު ކެއުމުން ބަރުދަން ލުއިވުމަށް މަގުފަހި ކުރުވައެވެ.
ހައިޑްރޭޝަން ނުވަތަ ހަށިގަނޑަށް ބޭނުންވާ މިންވަރަށް ފެން ލިބުމަކީ ވެސް ބަރުދަން ލުއި ކުރުމަށް މުހިންމުވާ ކަމެކެވެ. ފެހި އާފަލުގައި ފެން ވެސް އެކުލެވެއެވެ. އެހެންވެ، މިއީ ވެސް ހަށިގަނޑު ހައިޑްރޭޓް ކޮށްދޭނެ ކަމެކެވެ.
ކެއުމުގައި އެކި ގޮތްގޮތަށް ފެހި އާފަލު ބޭނުން ކުރެވިދާނެއެވެ. ފޮތިކޮށްގެން ކެއުމާއި، ސްމޫތީއެއް ހެދުމާއި، ސެލެޑްތަކުގައި ހިމަނާލުމުގެ އިތުރުން ހެލްތީ ޑެޒަޓެއް ހަދާއިރު ވެސް އާފަލު ބޭނުން ކުރެވޭނެ ގޮތްތައް ހުރެއެވެ.
ޑައިޓުގައި އާފަލު ހިމަނާން ވަކި ހާއްސަ ވަގުތެއް ނޯވެއެވެ. ނަމަވެސް އެންމެ ރަނގަޅީ ހެނދުނުގެ ނާސްތާގެ ވަގުތުގައި އާފަލު ކެއުމެވެ. ސަބަބަކީ މިކަމުގެ ސަބަބުން، ދުވާލުގެ އެހެން ވަގުތުތަކުގައި ގިނައިން ކެވުން މަދު ކުރެވިގެންދާނެތީއެވެ.
2009 ވަނަ އަހަރުގައި ހެދި ދިރާސާއަކުން ވަނީ މިކަން ހާމަވެފައެވެ.
އެގޮތުން ކެއުމުގެ ކުރިން އާފަލު ކެއުމުން، މި މޭވާ ނުކާ މީހުންނަށްވުރެ 15 އިންސައްތަ ކެލެރީ މަދުވާކަން ދިރާސާ އިން ވަނީ އެނގިފައެވެ.
