ލ.ގަމުގެ ސްކޫލްގައި ގްރޭޑު ނުވައެއްގައި ތައުލީމު ހާސިލު ކުރަމުންދިޔަ ފިރިހެން ދަރިވަރަކު ރަހީނު ކުރުމަށްފަހު ބަރަހަނާކޮށް، ވީޑިއޯ ނަގައި، ބްލެކްމެއިލް ކުރި މައްސަލައެއް ފެންމަތިވެއްޖެއެވެ.
މި މައްސަލައާ ގުޅޭގޮތުން މިއަދު މީޑިއާތަކަށް ފޮނުވި މެސެޖެއްގައި ފުލުހުން ބުނީ އެކަން ފުލުހުންގެ ސަމާލުކަމަށް އައިސްފައިވާ ކަމަށެވެ.
އަދި ކަމާ ގުޅުން ހުރި އިދާރާތަކާ ގުޅިގެން މިކަމާ ގުޅޭ މައުލޫމަތު ހޯދުމުގު މަސައްކަތް ކުރަމުންދާ ކަމަށްވެސް މައުލޫމާތު ދިނެވެ.
މި ހާދިސާގައި ހިމެނޭ ވިކްޓިމްގެ މަންމަ، ރޭ ފޭސްބުކްގައި ކުރި ޕޯސްޓެއްގައި ބުނީ ހަމަދް ބިން ހަލީފާ އަލް ޘާނީ ގައި ކިޔަވަމުންދާ ދަރިވަރަކު ދިރިއުޅޭ ގެއަށް އެހެން ދަރިވަރަކު ވަދެ އެ ކުއްޖާ ރަހީނުކޮށްގެން އެހެން ތަނަކަށް ގެންގޮސް ބަރަހަނާކޮށްފައިވާ ކަމަށެވެ.
އެ ދަރިވަރު ރަހީނު ކުރީ ވެސް އެ ސްކޫލްގައި ކިޔަވަމުންދިޔަ ދަރިވަރުން ތަކެކެވެ. އެ ކުއްޖާ ބޭރަށް ނެރެގެން ދިޔައީ، ކުޑަދޮރުން ކޮޓަރިއަށް ވަދެގެންކަން އެނގިފައިވެއެވެ.
ކުއްޖާ ރަހީނު ކުރި ދަރިވަރުން ޑިމާންޑު ކުރީ، 500 ރުފިޔާ ދިނުމަށެވެ. އެވަރަށް ފައިސާ ނުދީފިނަމަ، ވީޑިއޯ ލީކުކޮށްލާނެ ކަމަށް ބުނެ، މަރުގެ އިންޒާރު ވެސް ދީފައިވެއެވެ.
މީގެ ކުރިން ވެސް، ސްކޫލްތަކުގައި ދަރިވަރުންނަށް ބުލީ ކުރުން ފަދަ މައްސަލަތައް ދިމާވެ، މީސްމީޑިއާގައި އާއްމުން ކަންބޮޑުވުންފާޅުކޮށްފައިވެއެވެ.
އަދި ރަހީނުކޮށް ނުވަތަ ބަރަހަނާކޮށް ބިރު ދައްކައިގެން ފައިސާ ފޭރުން ފަދަ މައްސަލަތައް ރާއްޖޭގައި އަންނަނީ އިތުރުވަމުންނެވެ.
