ޕްރޮސިކިއުޓަރ ޖެނެރަލް (ޕީޖީ) އަށް ރަސްމީކޮށް ޝަކުވާ ހުށަހެޅުމުގެ ފުރުސަތު ހުޅުވާލައިފިއެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ޕީޖީ އައްބާސް ޝަރީފް ވިދާޅުވީ، ފާއިތުވީ ތިން ހަފްތާގައި ވަރަށް ގިނަ ފަރާތްތަކުން އީމެއިލް، ސިޓީ، އެސްއެމްއެސް އަދި ފޯނުން ޝަކުވާ ހުށަހަޅަމުންދާތީ، އިއްޔެއިން ފެށިގެން 20 ދުވަހަށް ރަސްމީކޮށް އާންމުންނަށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.
ޕީޖީގެ ވެބްސައިޓު މެދުވެރިކޮށް އަދި ކޮންމެ ރަށެއްގެ ޕީޖީ އޮފީހަށް ޝަކުވާ ހުށަހެޅޭނެ ކަމަށް އޭނާ ވިދާޅުވިއެވެ.
ޝަކުވާ ލިބުމުން ޕީޖީވެސް ހިމެނޭ ގޮތަށް ޓީމެއް ނަގައިގެން ހުރިހާ މައްސަލަތައް ވަކިވަކިން ދިރާސާކޮށް ބަލާފައި ގޮތެއް ނިންމާނެ ކަމަށާއި މައްސަލައިގެ ތަފްސީލު އެނގޭގޮތަށް ހުށަހެޅުމަށް އައްބާސް އެދިލެއްވިއެވެ. އަދި ކުރިން ނިންމާފައިވާ ނިންމުމެއް ބަދަލުކުރާނަމަ އެ ސަބަބު ރައްޔިތުންނަށް ހާމަކުރާނެ ކަމަށްވެސް ވިދާޅުވިއެވެ.
ޕްރޮސެކިއުޝަން މައްސަލަތަކުގައި ކަންތައްތައް ތަރުތީބުން ހިނގާނެ ގޮތަށް ސިސްޓަމެއް އޮތްކަމަށާއި، އެތަނުގައި މަސައްކަތްކުރައްވާ ބޭފުޅުންނާއި ޤާއިމުކޮށްފައިވާ ސިސްޓަމަށް އިތުބާރުކުރައްވާ ކަމަށް އައްބާސް ވިދާޅުވިއެވެ.
ނަމަވެސް ރަނގަޅުކުރަންޖެހޭ ބައެއް ކަންތައްތައް ހުރިކަން ފާހަގަކުރައްވައި، އޮފީހުގެ އެތެރޭގެ ސިސްޓަމަށްވެސް ބަދަލުތަކެއް ގެންނާނެ ކަމަށް އޭނާ ވިދާޅުވިއެވެ.
މި ބަދަލުތައް ދިރާސާކޮށް ބެލުމަށްފަހު ކޮންމެހެން ގެންނަންޖެހޭ ބަދަލުތައް ގެންނާނެ ކަމަށާއި، އެހެންނަމަވެސް އެ ބަދަލުތައް ގެނެވެންދެން މިހާރުވެސް މަސައްކަތްތައް ކުރިއަށްދާ ގޮތަށް ސިސްޓަމު ކުރިޔަށް ގެންދާނެ ކަމަށް ޕީޖީ ވަނީ ވިދާޅުވެފައެވެ.
