ވެރިރަށް މާލޭގެ ސްކޫލެއްގައި ކިޔަވައިދެނިކޮށް، ކްލާހަށް ވަދެ ޓީޗަރުންނަށް ބިރު ދެއްކި މީހާ ބަންދުގައި ބެހެއްޓުމަށް ފަހު، ދޫކޮށްލައިފިއެވެ.
މި މައްސަލައިގައި ބަންދުކުރީ މއ. ކަނޑޫގޭ އަލީ އަހުމަދުއެވެ.
އަލީގެ ބަންދު އަމުރުގައިިވާ ގޮތުން އޭނާވަނީ ސްކޫލަކަށް ވަދެ، ދަރިވަރުންނަށް ކިޔަވައިދިނުމަށް ކުލާސްރޫމުގައި ހުރި ޓީޗަރަށް ބިރު ދައްކައިފައެވެ.
އަމުރުގައިވާ ގޮތުން އަލީ ވަނީ މިކަމަށް އެއްބަސްވެފައެވެ.
އަދި އޭނާ އަށް އެކަން ކުރެވުނީ ޖަޒުބާތުގައި ޖެހިގެން ކަމަށާއި އެކަމާ ދެރަވާ ކަމަށް ބުނެ މައާފަށްވެސް އެދިފައިވެއެވެ.
އެހެންކަމުން މި މައްސަލައިގެ ތަހުގީގު އަވަސްކޮށް ދައުވާ ކުރުމާމެދު ގޮތެއް ނިންމުމަށް ޕްރޮސެކިއުޓާ ޖެނެރަލްގެ އޮފީހާއި މަޝްވަރާ ކުރަމުންދާ ކަމަށް ފުލުހުން ވަނީ އޭރު ކޯޓުގައި ބުނެފައެވެ.
އަލީގެ ބަންދުގައި ބެހެއްޓުމަށްފަހު ބަންދުގެ މުއްދަތު ހަމަވުމުން ބަންދާ މެދު ގޮތެއް ނިންމަން ކުރިމިނަލް ކޯޓަށް ހާޒިރު ކުރުމުން ދޫކޮށްލިއިރު، އޭނާގެ މައްޗަށް ދައުވާކުރުމަށް ޕީޖީ އޮފީހަށް ފޮނުވާފައިވާ ކަމަށް ފުލުހުން މައުލޫމާތުދެއެވެ.
