ރައީސުލްޖުމްހޫރިއްޔާ ޑރ. މުހައްމަދު މުއިއްޒު 160 ކައުންސިލާ ބައްދަލުކުރައްވައި، އަމިއްލަފުޅަށް މައްސަލަތައް ނޯޓުކުރައްވައި އެ މައްސަލަތައް ހައްލުކުރެއްވުމަށް މަސައްކަތް ކުރައްވަމުން ގެންދަވާ ކަމަށް ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
އެމަނިކުފާނު ވަނީ 160 ކައުންސިލާ ބައްދަލުކުރައްވައި، އަމިއްލަފުޅަށް މައްސަލަތައް ނޯޓުކުރައްވައިފައި ކަމަށާއި، އެ މައްސަލަތައް ހައްލުކުރެއްވުމަށް މަސައްކަތް ކުރައްވަމުން ގެންދަވާ ކަމަށް ވިދާޅުވިއެވެ.
”ލާމަރުކަޒީ ނިޒާމު ހަރުދަނާކޮށް ކައުންސިލްތައް މާލީގޮތުން ބާރުވެރިކޮށް، ރާއްޖޭގެ ލާމަރުކަޒީ ނިޒާމުގެ ޗެމްޕިއަން ކަން ރައީސް މުޢިއްޒު ހޯއްދަވާނެ،“ މިނިސްޓަރު ވިދާޅުވިއެވެ.
ރައީސް މުއިއްޒުގެ މި މަސައްކަތްޕުޅަކީ ރާއްޖޭގެ ލާމަރުކަޒީ ނިޒާމު ހަރުދަނާކުރުމަށާއި، ރަށްރަށުގެ ތަރައްގީއަށް އިތުރު ބާރެއް ލިބިގެންދާނެ ކަމެއް ކަމަށް ވެސް އާދަމް ޝަރީފު ވިދާޅުވިއެވެ.
އަދި މިކަމުގެ ސަބަބުން ކައުންސިލްތަކުގެ މާލީ ގާބިލުކަން އިތުރުވެ، ރަށްރަށުގެ ތަރައްގީއަށް ބޭނުންވާ މަޝްރޫޢުތައް ހިންގުމަށް ފަސޭހަވެގެންދާނެ ކަމަށްވެސް ވިދާޅުވިއެވެ.
ކައުންސިލްތަކަށް ލިބޭ އާމްދަނީ އިތުރުކުރުމަށް ކައުންސިލްތަކަށް ފަޅުރަށްތައް ލިބޭނެ މަގުފަހިކޮށްދެއްވުމާއި، ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލްތަކަށް ޖަމާކޮށްދިނުމަށް މި ސަރުކާރުން ވަނީ ނިންމަވައިފައެވެ.
