ގޭންގުތަކާ ދެކޮޅަށް ހަރުކަށި ފިޔަވަޅު އަޅާނެ ކަމަށް ހޯމް މިނިސްޓަރު، އަލީ އިހުސާން ވިދާޅުވެއްޖެއެވެ.
މިނިސްޓަރު އިހުސާން މިހެން ވިދާޅުވެފައިވަނީ ހުޅުމާލޭގައި ހުންނަ ހިޔާ ފްލެޓެއްގައި މީހަކު ރަހީނު ކޮށްގެން އުޅޭ މައުލޫމާތު ފުލުހުންގެ އިންޓެލިޖެންސަށް ރޭ ލިބުމާއި ގުޅިގެން ހިންގި އޮޕަރޭޝަނަކަށް ފަހު، ނޫސްވެރިންނަށް މައުލޫމާތު ދެއްވަމުންނެވެ.
ރޭ ފުލުހުން ހިންގި އޮޕަރޭޝަނެއްގައި ހިޔާ ޝަހަރުގެ ނުވަ ވަނަ ޓަވަރުގެ 11 ވަނަ އެޕާޓްމަންޓުގެ ދޮރުވައްޓާލައި އެތަނަށް ވަދެ ފުލުހުން ވަނީ 12 މީހުން ހައްޔަރުކޮށްފައެވެ.
އަދި ފުލުހުން ވަނީ ރަހީނުކޮށްފައިވާ މީހާ ސަލާމަތް ކޮށްފައެވެ.
މިކަމާއި ގުޅިގެން އިހުސާން ވިދާޅުވީ، ރައީސް، ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގެންނެވިއިރު، ގޭންގްތަކާއި މަސްތުވާތަކެތި ވިއްކުމާއި އެތަކެތި ބޭނުން ކުރުން އިންތިހާއަށް އިތުރުވެފައިވާ ކަމަށެވެ.
އަދި ރައީސް މުއިއްޒުގެ ފަސް އަހަރުގެ ދައުރެއްގައި އެފަދަ ކަންކަން ހުއްޓުވައި، ރާއްޖެއަކީ ރައްޔިތުންނަށް ދިރިއުޅެން ހިތްފަސޭހަ އަމާން ތަނެއްގެ ގޮތުގައި ހެދުމަކީ އަމާޒެއް ކަމަށާއި، އެގޮތުގެމަތިން ގޭންގްތަކާއި ދެކޮޅަށް ފުލުހުންގެ ތެރޭގައި ހާއްސަ ޔުނިޓެއް ވެސް އުފެއްދި ކަމަށެވެ.
ރޭގެ އޮޕަރޭޝަނުގައި ފުލުހުން ކުރި މަސައްކަތަށް މިނިސްޓަރު ތައުރީފު ކުރެއްވިއެވެ.
