މި އަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު 1.7 މިލިއަނަށް އަރައިފިއެވެ.
ޓޫރިޒަމް މިނިސްޓްރީން މި މަހުގެ ހަ ވަނަ ދުވަހު އާއްމުކޮށްފައިވާ ތަފާސްހިސާބުތައް ދައްކާގޮތުން ނޮވެމްބަރު ފަސް ވަނަ ދުވަހުގެ ނިޔަލަށް ރާއްޖެއަށް 1.69 ފަތުރުވެރިން އައިސްފައި ވެއެވެ.
މިދިޔަ އަހަރު އެ މުއްދަތު އުޅެނީ 1.57 ގައެވެ. މިހާރު ރާއްޖެއަށް ދުވާލެއްގެ މައްޗަށް އެވްރެޖްކޮށް 5،000 އަށްވުރެ ގިނަ ފަތުރުވެރިން ޒިޔާރަތް ކުރެއެވެ.
މިދިޔަ އަހަރާ އަޅާކިޔާއިރު، އަންނަ ފަތުރުވެރިންގެ އަދަދުތައް %9.5 އިތުރެވެ.
ނޮވެމްބަރު މަހުގެ ފަސް ވަނަދުވަހާއި ހަމައަށް ރާއްޖެއަށް 29،304 ފަތުރުވެރިން އައިސްފައިވާއިރު، މިދިޔަ އަހަރު އެ މުއްދަތުގައި އަދަދުތައް އުޅެނީ 26،988 ގައެވެ.
ތަފާސްހިސާބުތައް ދައްކާގޮތުން، ރާއްޖެއަށް އެންމެ ގިނައިން ފަތުރުވެރިން އަންނަ ލިސްޓުގެ އެއްވަނައިގައި އޮތް ޗައިނާއިން 241،523 ފަތުރުވެރިން އައިސްފައިވެއެވެ.
ދެވަނައިގައި އޮތް ރަޝިޔާއިން 189،193 ފަތުރުވެރިން އައިސްފައިވެއެވެ.
އަދި ތިންވަނައިގައި އޮތް އިނގިރޭސިވިލާތުން ރާއްޖެއަށް 145،774 ފަތުރުވެރިން އައިސްފައިވާއިރު، ހަތަރުވަނައިގައި އޮތް ޖަރުމަންވިލާތުން ރާއްޖެއަށް 129،259، ފަސްވަނައިގައި އޮތް އިޓަލީވިލާތުން 116،195 އަދި ހަ ވަނައިގައި އޮތް އިންޑިއާއިން 103،438 ފަތުރުވެރިން އައިސްފައި ވެއެވެ.
