މާބަނޑު ދުވަސްވަރު ތުއްތު ދަރިފުޅާއި މައިމީހާގެ ސިއްހަތަށް ފައިދާ ކުރާނެ ތަފާތު ވައްތަރުގެ މޭވާއާއި ތަރުކާރީ ކެއުމަށް ހާއްސަ ސަމާލުކަމެއް ދޭން ޖެހެއެވެ.
މިގޮތުން ގިނަ ބަޔަކަށް ވަރަށް މީރު މޭވާއެއް ކަމުގައިވާ ކިވީ އަކީ، އޭގައި ސިއްހީ ގިނަ ފައިދާތަކެއް އެކުލެވިގެންވާ މޭވާއެކެވެ.
މިއީ އޭގައި ގިނަ މިންވަރަކަށް ފޯލިކް އެސިޑް ހިމެނޭ މޭވާއެކެވެ. މި މާއްދާ އަކީ ބަނޑުގައިވާ ތުއްތު ދަރިފުޅު އައިބުވުމުން ދުރުކޮށްދޭ މާއްދާއެކެވެ.
ކިވީ ކެއުމުން ބަނޑުގައިވާ ތުއްތު ދަރިފުޅުގެ ވިސްނުން ތޫނުވާނެ ކަމަށް ވެސް ސިއްހީ މައުލޫމާތު ހިމެނޭ ލިޔުންތަކުގައިވެއެވެ.
ހަށިގަނޑުގެ ދިފާއީ ނިޒާމް ވަރުގަދަ ކުރަން ބޭނުންވާ ފަރާތްތަކުން ވެސް ކޮންމެހެންވެސް ކިވީ ކާންޖެހެއެވެ.
މިއީ އެކި އިންފެކްޝަންތަކުން އިންސާނާގެ ހަށިގަނޑު ސަލާމަތް ކޮށްދިނުމަށް އެހީތެރިވެދޭ މޭވާއެކެވެ.
ހަކުރު ބައްޔަކީ ދިވެހިންގެ ތެރޭގައިވެސް ވަރަށް އާންމު ބައްޔެކެވެ. ކިވީ ކާނަމަ، މިބަލި ކޮންޓްރޯލް ކުރަން ވެސް އެހީވެއެވެ.
މި މޭވާ އަކީ ވަކިން ހާއްސަކޮށް ވިޓަމިން ސީން މުއްސަނދި އެއްޗެކެވެ. ކިވީން ލިއްބައިދޭ މާއްދާތަކުގެ ތެރޭގައި ވިޓަމިން އީ، ކޭ، ފޮލޭޓް، ކޮޕާ، ޕޮޓޭސިއަމް، އެންޓިއޮކްސިޑަންޓްސް، ޕްރޮޓީން އަދި އަޔަން ހިމެނެއެވެ.
ކިވީގެ ފައިދާތަކުގެ ތެރޭގައި ބަރުދަން ލުއިކޮށްދޭން އެހީވުން ވެސް ހިމެނެ އެވެ. އެހެންވެ މިއީ ހިކެން ބޭނުންވާ މީހުންގެ ޑައިޓްގައި ހިމެނުން މުހިންމު މޭވާއެކެވެ.
