ރޭ މި ހާދިސާ ހިނގީ ހ.ކުއްޅަވައްދޮށުގޭގެ ތިން ވަނަ ފަންގިފިލާގައެވެ.

އެ ގޭގައި ރޯވި އަލިފާން، އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ހަރަކާތްތެރިވެ ވަނީ ނިއްވައިލައިފައެވެ.

އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް މި ހާދިސާގެ މަޢުލޫމާތު ރޭ  22:10 ހާއިރު ލިބުމާ އެކު ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައިވާ ކަމަށް އެމްއެންޑީއެފުން ބުނެއެވެ.

މިގޮތުން ފަޔަރފައިޓަރުން ކުރި މަސައްކަތުން ރޯވެފައިހުރި އަލިފާން އެއްކޮށް ނިއްވާލެވުނީ 23:25 ހާއިރުއެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ އިރު، އެ ފަންގިފިލާގައި ހުރި ބައެއް ސާމާނަށް ވަނީ އެކިވަރުގެ ގެއްލުންތައް ލިބިފައެވެ.

މާލޭގައި ރޭ އަލިފާނުގެ ހާދިސާއެއް ހިނގިއިރު، މި މަހުގެ 1، 2 އަދި 4 ވަނަ ދުވަހުގެ ރޭ ވެސް މާލޭގައި އަލިފާނުގެ ހާދިސާއެއް ހިނގައިފައިވެއެވެ.