ހުޅުމާލޭގެ ދެވަނަ ފިޔަވަހީގައި ޕާކެއް ތަރައްގީކުރުމުގެ މަޝްރޫއުގެ އެއްބަސްވުމުގައި ސޮއިކޮށްފިއެވެ.
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މި މަޝްރޫއު ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އަށެވެ.
އެޗްޑީސީގެ ހެޑް އޮފީހުގައި ބޭއްވި ރަސްމިއްޔާތެއްގައި މި އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހްމަދު އާތިފެވެ. އަދި އާރްޑީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މޫސާ އަލި މަނިކެވެ.
ހުޅުމާލޭ ފޭސް 2 ގައި ޕާކެއް ހެދުމަށާއި ހުޅުމާލެ ފޭސް 1 ގެ ބީޗް ބުލެވަރޑް މިހާރަށްވުރެ ޝައުގުވެރިކަން އުފެދޭނެ މާޙައުލެއްގެ ގޮތުގައި ޒަމާނީ ފެންވަރަށް ތަރައްޤީ ކުރުމުގެ އެއްބަސްވުމުގައި @hdcmaldives އާއެކު އާރުޑީސީ އިން މިއަދުވަނީ ސޮއިކޮށްފައި. pic.twitter.com/VDWAqo3fFr
— Road Development Corporation Ltd (@rdcmaldives) September 25, 2022
މައުލޫމާތު ލިބިފައިވާ ގޮތުގައި، މި އެއްބަސްވުމުގެ ދަށުން ހިޔާ ސަރަހައްދުގައި ހިޔާ ޕާކް ތަރައްގީކުރުމުގެ އިތުރުން ހުޅުމާލެ ފުރަތަމަ ފިޔަވަހީގައި ބީޗް ބުލެވާޑް ޒަމާނީ ފެންވަރަށް ތަރައްގީކުރުމުގެ މަސައްކަތް ވެސް ކުރާނެ ކަމަށެވެ.
ހިޔާ ސަރަހައްދުގައި ހިޔާ ޕާކް ތަރައްގީކުރުމުގެ މަސައްކަތުގެ ތެރެއިން ގާޑަން އޭރިއާއެއް ހެދުމާއި އެލެވޭޓެޑް ޕާތުވޭ ހެދުމުގެ އިތުރުން ޕްލާޒާ ހެދުމުގެ މަސައްކަތް ކުރުމަށް ހަމަޖެހިފައިވެެއެވެ.