ރައީސް ނަޝީދު ވިދާޅުވީ، އެމްޑީޕީގެ ގިނަ މެމްބަރުން ސަރުކާރާއި ދުރަށްދާން ޖެހުނު އެންމެ ބޮޑު އެއް ސަބަބަކީ ބޯހިޔާވަހިކަމުގެ މައްސަލައިގެ ސަބަބުން ކަމަށާއި، މި ސަރުކާރަށް މާލޭގެ އިތުރުން ރާއްޖޭގެ އެކި ކަންކޮޅުތަކުގައި ހުރި ބިން ބޮޑު ރަށްރަށުގައި ވެސް ބޯހިޔާވަހިކަމުގެ މައްސަލައަށް ހައްލު ހޯދިފައި ނުވާ ކަމަށެވެ.
މީގެ އިތުރުން ރައީސް ނަޝީދު ވިދާޅުވީ، ރާއްޖޭގެ ރައްޔިތުންގެ އާއްމު ހާލަތު ރަނގަޅުކޮށް ދިވެހިންނަކީ ފުދުންތެރި ބަޔަކަށް ހެދުމަށް ސަރުކާރުން އެންމެ އިސްކަމެއް ދީގެން ކުރަންޖެހޭނެ ކަމަކީ ބޯހިޔާވަހި ކަމުގެ މައްސަލައަށް ހައްލެއް ހޯދައިދިނުން ކަމަށެވެ. އަދި ދެން އުފެދޭ އެމްޑީޕީގެ ސަރުކާރަކުން އެ މަސައްކަތުގައި އަވަދިިނެތި އުޅޭނެ ކަމަށް ރައީސް ނަޝީދު ވަނީ ވިދާޅުވެފަ އެވެ.
ރައީސް ނަޝީދު މިހެން ވިދާޅުވިއިރު ރައީސް ސޯލިހު އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވަނީ ބޯހިޔާވަހިކަމުގެ ވައުދު ފުއްދުމަށް ކުރަމުން ގެންދާ މަސައްކަތުގެ ތަފްސީލު ދެއްވާފަ އެވެ.