ސަރުކާރުގެ އިސްވެރިންގެ މުސާރައަށް ރައްޔިތުންގެ މާލިއްޔަތު ކޮމިޓީން ގެނައި ބަދަލުގެ ސަބަބުން، މުސާރައަށް އިތުރުވާ ބައި، ކުޑަކުދިންގެ ހިޔާ ފަދަ އިޖްތިމާޢީ ފަންޑަކަށް ހަދިޔާ ކުރަން ސަރުކާރުން ނިންމަވައިފިއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ދާދި ދެންމެއަކު ވަނީ މިކަން ހާމަކުރައްވައިފައެވެ.

އެމަނިކުފާނު އެކްސްގައި ކުރެއްވި ޕޯސްޓުގައި ވިދާޅުވީ، ރައީސް، ނައިބު ރައީސް، އަދި ވަޒީރުންގެ މުސާރަ ބޮޑު ކުރުމަށް ސަރުކާރުން އެދިފައިނުވާނެ ކަމަށާއި، މުސާރަ ބޮޑު ކުރުމަށް ބޭނުންފުޅުވެނުލައްވާ ކަމަށެވެ.

”އެއްވެސް މަޝްވަރާއެއް ކުރުމެއް ނެތި، މި ގެނައި ބަދަލުގެ ސަބަބުން ލިބޭ މުސާރައިގެ ކުރިއެރުން ކުޑަކުދިންގެ ހިޔާ ފަދަ އިޖްތިމާޢީ ފަންޑަކަށް ހަދިޔާ ކުރަން އަޅުގަނޑުމެން ނިންމައިފިން.“ ރައީީސް ވިދާޅުވިއެވެ.

Raees, naib raees, vazeerunge musaara bodu kuran sarukaarun edhifa nuvaane. Adhi bodu kuraakah beynumevves noon. Evves mashwara eh kurumehnethi mi genai badhaluge sababun libey musaaraige kuri erun kudakudhinge hiyaa fadha ijthimaaee fund akah hadhiyaa kuran alhugandumen…

— Dr Mohamed Muizzu (@MMuizzu) December 20, 2023

އިއްޔެ ކުރިއަށްދިޔަ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި އިއްތިފާޤުން ވަނީ ރައްޔިތުންގެ މަޖިލީހުގެ މެމްބަރުންގެ މުސާރަ 80،000ރ. އަށް ބޮޑުކުރަން ފާސްކޮށްފައެވެ.

މި ބަދަލާއެކު މެމްބަރުންނަށް ކުރިއެކޭ އެއްގޮތަށް ކޮމިޓީ އެލަވަންސް ވެސް ލިބޭނެއެވެ. އެހެން ކަމުން ކޮމިޓީ އެލަވަންސަށް ދޭ 20،000ރ. ހިމަނައިގެން މެމްބަރެއްގެ މުސާރައިގެ ގޮތުގައި އެއް ލައްކަ ރުފިޔާ ޖެހެއެވެ.

ކޮމިޓީ ބައްދަލުވުމުގައި ވަނީ ރައީސުލްޖުމްހޫރިއްޔާގެ އަސާސީ މުސާރަ 120،000ރ. އަށް ބޮޑު ކުރުމަށާއި، ރައީސުލްޖުމްހޫރިއްޔާގެ ނާއިބުގެ އަސާސީ މުސާރަ 93،000ރ. އަށް ބޮޑު ކުރުމަށް ވެސް ވަނީ ފާސްކޮށްފައެވެ. އަދި ވަޒީރުންގެ މަޖިލީހުގެ މެމްބަރުންގެ މުސާރަ 74،000ރ. އަށް ބޮޑުކުރުމަށް ވެސް ވަނީ ފާސްކޮށްފައެވެ.

މީގެއިތުރުން ސިޓީ ކައުންސިލްތަކުގެ މޭޔަރުންނާއި ކައުންސިލަރުންގެ މުސާރަ ބޮޑުކުރަން ވެސް މަޖިލީހުގެ މާލިއްޔަތު ކޮމިޓީން އިއްޔެ ނިންމިއެވެ. އެ ކޮމެޓީން ފާސްކޮށްފައިވަނީ މޭޔަރުންގެ އަސާސީ މުސާރަ 36،000ރ. އަށް ބޮޑުކޮށް، ލިވިން އެލަވަންސްގެ ގޮތުގައި 10،000ރ. އާއެކު ޖުމްލަ 46،000ރ. އަށް ބޮޑުކުރުމަށެވެ.

ޑެޕިޔުޓީ މޭޔަރަށް އަސާސީ މުސާރައިގެ ގޮތުގައި 32،500ރ. އާއި ލިވިން އެލަވަންސްގެ ގޮތުގައި 8،000ރ. އާއެކު ޖުމްލަ 40،500ރ. ހަމަޖެއްސުމަށް ވެސް ކޮމިޓީން ވަނީ ފާސްކޮށްފައެވެ.

ސިޓީ ކައުންސިލްތަކުގެ މެންބަރުންގެ އަސާސީ މުސާރަ 29،000ރ. ބޮޑު ކުރުމަށާއި، ލިވިން އެލަވަންސްގެ 6،000ރ. އާއެކު ޖުމްލަ 35،000ރ. ދިނުމަށް ވެސް ވަނީ ފާސްކޮށްފައެވެ.

އަދި އަތޮޅު ކައުންސިލްގެ ރައީސުންނަށް އަސާސީގެ މުސާރައިގެ ގޮތުގައި 27،000ރ. ލިވިން އެލަވަންސްގެ ގޮތުގައި 6،000ރ. އާއެކު ޖުމްލަ 33،000ރ. ދިނުމަށް ވަނީ ފާސްކޮށްފައެވެ.

މިކަމާ ގުޅިގެން އާއްމުން ދަނީ އެމްޑީޕީގެ މެމްބަރުންނަން ވަރަށް ބޮޑަށް ފާޑު ކިޔަމުންނެވެ.