މަޤާމާއި ޙަވާލުވެވަޑައިގެންނެވިއިރު، ރޯޑް ޑިވެލޮޕްމަންޓް ކޯޕަރޭޝަން(އާާރްޑީސީ)ގެ މަސައްކަތައް ރަށްރަށުގައި ކުރިއަށް ނުދާތާ ހައެއްކަ މަސް ދުވަސް ވެފައިވާ ކަމަށް، އެ ކުންފުނީގެ މެނޭޖިން ޑިރެކްޓަރު ޢަލީ ޒުހައިރު ވިދާޅުވެއްޖެއެވެ.
ޕީއެސްއެމްގެ ”ރާއްޖެމިއަދު“ ޝޯގައި ވާހަކަ ދައްކަވަމުން އާރްޑީސީގެ އައު އެމްޑީ ވަނީ، އެ ކުންފުނީގެ މާލީ ޙާލަތު ރަނގަޅު ނޫންކަން ފާހަގަކުރައްވައި، ރަށްރަށުގައި ކުންފުނިން ހިންގަން ފެށި މަޝްރޫޢުތައް ވެސް ހުއްޓުމަކަށް އައިސްފައި އޮތް ކަމަށް ވިދާޅުވެފައެވެ.
”ބައެއް ރަށްރަށުގައި ކޮންމެވެސް ވަރަކަށް މަސައްކަތްކުރި. ހުރިހައި ރަށެއްގައި ވެސް މަސައްކަތްތައް ވަނީ ހުއްޓުމަކާ ގާާތްވެފަ. މާލޭގެ މަސައްކަތް ހިނގާފައި ވަނީ، ހަމައެކަނި އަމީނީ މަގުގެ ވަކި ހިސާބަކާ ހަމައަށް.“ އެމްޑީ ޒުހައިރު ވިދާޅުވިއެވެ.
ޒުހައިރުގެ ވާހަކައިގައި ރަށްރަށުގައި އަލުން އާރްޑީސީގެ މަސައްކަތްތައް ފަށަމުން ގެންދާކަން ފާހަގަކުރައްވައި، 17 ރަށެއްގައި މަސައްކަތް ފަށައިފައިވާ ކަމަށް ވިދާޅުވިއެވެ.
އާރްޑީސީގެ ބޮޑު ދަރަންޏެއް ވެސް އޮތްކަން ފާހަގަކުރައްވައި ދަރަނީގެ ގޮތުގައި ދައްކަން ޖެހޭ ފައިސާގެ އަދަދު 300 މިލިއަން ރުފިޔާއާއި ގާތް ކުރާ ކަމަށް ވިދާޅުވެ، ޒުހައިރު ކަންބޮޑުވުންފާޅުކުރެއްވިއެވެ.
