އުރީދޫ މޯލްޑިވްސް އިން ކުރިއަށް ގެންދަމުންދާ ”ގްރޯ ވިތް އުރީދޫ“ގެ ސެޝަނެއް ސ. ފޭދޫގައި ބާއްވައިފިއެވެ.
އިސްރަށްވެހިންނަށް ހާއްސަކޮށްގެން، މި މަހުގެ 25 ވަނަ ދުވަހު ކުރިއަށް ގެންދިޔަ މި ސެޝަނުގައި ގޭގައި ގަސްއިންދުމާއި ހެއްދުމަށް ކުރެވިދާނެ ކަންކަން ކިޔާދީ އަމަލީ ސެޝަނެއްވެސް ކުރިއަށް ގެންގޮސްފައިވެއެވެ.
މި ސެޝަން ކުރިއަށް ގެންގޮސްފައި ވަނީ ސ. ފޭދޫ އަވަށު އޮފީހާ ގުޅިގެންނެވެ.
މި ސެޝަން ނަގައިދިނީ އުރީދޫގެ ”ގްރޯ ވިތް އުރީދޫ“ ބްރޭންޑް އެމްބެސެޑަރ ރަމްޒީ ހުސައިންއެވެ.
މި ހަރަކާތުގައި އުމުރުން ދުވަސްވީ މުޖުތަމައުގެ ބޭނުންތަކަށް އަމާޒުކޮށްގެން އަމަލީ ސެޝަނެއް ކުރިއަށް ގެންދެވި ބައިވެރިންނާއިއެކު މަޝްވަރާކޮށް، އަދި ސުވާލުތަކަށް ޖަވާބު ދިނުން ކުރިއަށް ދިޔައެވެ.
އަދި މިކަހަލަ އެކްޓިވް ހަރަކާތްތަކުން ޖިސްމާނީ އަދި ނަފްސާނީ ދުޅަހެޔޮކަމަށް ލިބިދޭ ފައިދާތަކަށް އަލިއަޅުވާލާފައިވެއެވެ.
މިއީ ”ގްރޯ ވިތް އުރީދޫގެ“ ސިލްސިލާ ހަރަކާތްތަކުގެ ތެރެއިން މިއަހަރު ބޭއްވޭ ތިން ވަނަ ހަރަކާތެވެ.
އައްޑޫގައި ބޭއްވި މި ހަރަކާތަކީ އުމުރުން ދުވަސްވީ މީހުންނަށް ހާއްސަކޮށްގެން އިންކްލޫސިވް އިވެންޓްތައް ބޭއްވުމަށް އުރީދޫއިން ކުރަމުންދާ މަސައްކަތުގެ ދަށުން، މުޖުތަމައުގައި ހަރަކާތްތެރި ފަރާތްތަކުގެ ގޮތުގައި ދެމިތިބުމަށް ހިތްވަރުދިނުމުގެ ގޮތުން ކުރިއަށް ގެންދާ ހަރަކާތެކެވެ.
”ގްރޯ ވިތް އުރީދޫ“ ސިލްސިލާގެ ދަށުން ރާއްޖޭގެ އެކި ރަށްރަށަށް ޒިޔާރަތްކޮށް ދެމެހެއްޓެނިވި އުސޫލުތައް ކުރިއަރުވައި ބައިވެރިންގެ މެދުގައި ގުޅުން ބަދަހިކުރުމުގެ ގިނަ ހަރަކާތްތަކެއް ވަނީ ރޭވިފައެވެ.
މި ސިލްސިލާގައި އެކި އުމުރުފުރާތަކަށް ހާއްސަކޮށްގެން ޕްރޮގްރާމްތައް ކުރިއަށް ގެންދެވޭނެ ކަމަށް އުރީދޫން ބުނެއެވެ.
އުމުރުން ދުވަސްވީ މީހުން ހިމެނޭ ގޮތަށް ތަފާތު ގުރޫޕްތަކަށް ހިދުމަތް ދޭ ގޮތަށް ހަރަކާތްތައް ފަރުމާކޮށް، އިންކްލޫސިވް ކޮމިއުނިޓީތައް ބިނާކުރުމަށް އުރީދޫ މޯލްޑިވްސް އިން އަބަދުވެސް މަސައްކަތް ކުރެ އެވެ. މައުލޫމާތު ހިއްސާކުރުމާއި އަމަލީ ހުނަރުގެ ޒަރިއްޔާއިން މި ޑިމޮގްރަފިކް ބާރުވެރިކުރުވައި، އެ މީހުންގެ ދިރިއުޅުމުގެ ފެންވަރު މަތިކޮށް ތިމާވެށީގެ ދެމެހެއްޓެނިވި ކަންކަމަށް އެހީތެރިކަން ފޯރުކޮށްދިނުމުގެ މަގު ފަހިކޮށްދިނުމަކީ އެ ކުންފުނީގެ އަމާޒެއް ކަމަށް އުރީދޫން ބުނެއެވެ.
