ސަލާމަތީ ހިދުމަތްތަކުގެ ކަންކަން ފާލުން ނެއްޓެމުން އަންނަ ކަމަށް ކުރީގެ ޑިފެންސް މިނިސްޓަރު އާދަމް ޝަރީފު އުމަރު ވިދާޅުވެއްޖެއެވެ.
ޕީއެންސީގެ ނައިބު ރައީސް، އަދި ރައްޔިތުންގެ މަޖިލީހުގެ މަޑުއްވަރި ދާއިރާގެ މެމްބަރު އާދަމް ޝަރީފު މިހެން ވިދާޅުވެފައިވަނީ ކުރެއްވި ޓްވީޓެއްގައެވެ.
ރާއްޖޭގައި އިންޑިއާ ސިފައިން ތިބުމާ ދެކޮޅަށް، ރޭވެސް އިދިކޮޅު ފަރާތްތަކުން ވަނީ އަޑު އުފުލައިފައެވެ. އިދިކޮޅު ޕީޕީއެމްގެ އޮފީސް ކައިރިން ފެށި މި އެއްވުން ހުއްޓުވުމަށް ފުލުުހުންނާ ސިފައިންވެސް ހަރަކާތްތެރިވިއިރު، އެއްވުމުގެ ބައެއް ބައިވެރިންނަށް ވަނީ ފުލުހުންގެ ފަރާތުން އަނިޔާވެސް ލިބިފައެވެ.
އަދި ސިފައިންގެ މީހަކު ޒުވާނެއްގެ އަތުން ”އިންޑިއާ އައުޓް“ ލިޔެފައިވާ ދިދައެއް އަތުލުމަށް މަސައްކަތް ކުރާ ވީޑިއޯއެއްވެސް އާންމުވެ، ގިނަ ބައެއްގެ ފާޑުކިޔުންވެސް އަމާޒުވެގެން ދިޔައެވެ.
މި ވީޑިއޯ ހިއްސާ ކުރައްވައި އާދަމް ޝަރީފު ވަނީ އެއްވުން ކޮންޓްރޯލް ކުރުމަށް ސިފައިން ނެރެން ޖެހޭ ފަދަ ހާލަތެއް އޮތްތޯ ސުވާލު ކުރައްވައިފައެވެ.
”ސިފައިން ނެރެން ޖެހޭނީ މިނިވަންކަމުގެ ދިފާއުގައި. ގައުމީ ސަލާމަތަށް ނުރައްކާ ވާފަދަ ކަންކަން ހިނގާފާނެ ކަމަށް ބެލެވޭ ނަމަ.“ އޭނާ ވިދާޅުވިއެވެ.
Male'ge aman amaankan belehettumah sifain nerenjehey fadha haalatheh eba oiythoa? Sifain neren jeheynee minivankamuge dhifaaugai, qumee salaamathah nurakkaa vaafadha kankan hingaafaanekamah belevey nama. Mihaaru salaamathee khidhumaithakuge kankan midhanee faalun nattamun. Dhera! pic.twitter.com/x4WSU7a4cE
— Adam Shareef Umar (@Adamshareefz) May 19, 2022
އިއްޔެ ކުރިއަށް ގެންދިޔަ އިންޑިއާ އައުޓް ހަރަކާތުގެ ބައިވެރީންގެ ތެރެއިން ފުލުހުން ވަނީ ހަތް މީހަކު ހައްޔަރު ކޮށްފައެވެ.
