ދަތުގެ ފަރުވާ ދެއްވުމުގައި މުޅި ރާއްޖެއަށް މަގުބޫލުވި ހިދުމަތްތެރިޔާ ޢަބްދުﷲ ސަޢީދު (ދަތްޖަހާ ސަޢީދު) އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
މީސްމީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ، ޢަބްދުﷲ ސަޢީދު އަވަހާރަވުމަކީ ޤައުމަށް ލިބުނު ވަރަށް ބޮޑު ހިތާމައެއް ކަމަށެވެ.
އަދި އޭނާއަކީ ދިގު މުއްދަތެއްގައި ޞިއްޙީ ޚިދުމަތުގައި އުޅުއްވި ބޭފުޅެއްގެ އިތުރުން، ދިވެހި މަސައްކަތްތެރިކަމުގެ އެކި ފަންނުތަކުގައިވެސް ބޮޑެތި ކާމިޔާބީތަކެއް ހާސިލު ކުރައްވާފައިވާ ހުނަރުވެރިއެއްކަން ރައީސް ފާހަގަކުރެއްވިއެވެ.
ދަތުގެ ފަރުވާގެ ދާއިރާއަށް ސަޢީދު ކުރެއްވި ޚިދުމަތްތައް ފާހަގަކޮށް މިއަހަރުގެ ޖުލައި މަހު ސަރުކާރުން ވަނީ އޭނާއަށް ޚާއްސަ އެވޯޑެއްވެސް އަރުވާފައެވެ.
”މާތްﷲގެ ރަޙްމަތާއި އޯގާވަންތަކަމުގައި، އަދި ސުވަރުގޭގެ ދާއިމީ ނިޢުމަތުގައި މަރްޙޫމް ޢަބްދުﷲ ސަޢީދު ލަހައްޓަވާށި! އާމީން،“ ރައީސްގެ މެސެޖުގައި ލިޔުއްވާފައިވެއެވެ.
ސަޢީދު އަވަހާރަވިއިރު އުމުރުފުޅަކީ 89 އަހަރެވެ. އޭނާ އަވަހާރަވީ ނޭވާލާން އުނދަގޫވެގެން އައިޖީއެމްއެޗަށް ގެންގޮސް ފަރުވާދެމުންދަނިކޮށް ހާޓްއެޓޭކެއް ޖެހިގެންނެވެ.
އޭނާގެ ކަށުނަމާދު އޮތީ މިއަދުގެ މެންދުރު ނަމާދަށް ފަހު އާސަހަރާ މިސްކިތުގައެވެ.
ސަޢީދަކީ 1986 ވަނަ އަހަރުން ފެށިގެން ރާއްޖޭގައި ދަތުގެ ފަރުވާދިނުމުގައި ހަރަކާތްތެރިވެވަޑައިގެންނެވި ބޭފުޅެކެވެ.
