ކުޑަކުދިންނަށް ކުރާ އަނިޔާ ހުއްޓުވުމުގެ ގަރާރެއްގައި ރާއްޖެއިން ސޮއިކޮށްފިއެވެ.
”ބޮގޯޓާ ކޯލް ޓު އެކްޝަން“ ގަރާރުގައި ރާއްޖޭގެ ފަރާތުން ސޮއިކުރެއްވީ ހެލްތު މިނިސްޓަރު ގީލާ އަލީއެވެ.
މި ގަރާރަކީ ކުޑަކުދިންނަށް ކުރާ އެކި ބާވަތުގެ އަނިޔާ ހުއްޓުވުމަށާއި ކުޑަކުދިންގެ ހައްގުތައް ރައްކާތެރިކުރުމުގެ ނިޒާމު ވަރުގަދަ ކުރުމުގެ މަގުސަދުގައި އެކުލަވާލާފައިވާ ގަރާރެކެވެ.
މި ގަރާރުގެ މަގުސަދުތަކުގެ ތެރޭގައި ކުޑަކުދިންނަށް އަނިޔާކޮށްގެން ހުށަހަޅާ މައްސަލަތަކަށް އިޖާބަދިނުމަށް ބައިނަލްއަގުވާމީ ފެންވަރުގައި ކުރެވޭ މަސައްކަތްތަކާއި ގައުމީ ފެންވަރުގައި ކުރެވޭ މަސައްކަތްތައް އިތުރަށް ހަރުދަނާކުރުންވެސް ހިމެނެއެވެ.
ގަރާރުގައި ސޮއިކުރުމުގެ ރަސްމިއްޔާތުގައި މިނިސްޓަރު ގީލާ ވިދާޅުވީ ބޮގޯޓާ ކޯލް ޓު އެކްޝަން ޑިކްލަރޭޝަންގައި ރާއްޖެއިން ބައިވެރިވުމަކީ ސަރުކާރުން ކުޑަކުދިންގެ ހައްގުތައް ރައްކާތެރިކޮށް ހިމާޔަތްކުރުމަށް ކުރަމުންދާ މަސައްކަތަށް ލިބުނު އިތުރު ކުރިއެރުމެއް ކަމަށެވެ.
