ލާމަރުކަޒީ ނިޒާމެއްގެ ހަގީގީ ސިފަ ޖެހޭނީ، ދަތުރުފަތުރުގެ ނިޒާމު ވަރުގަދަ ވެެގެން ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.
މިނިސްޓަރު ނަހުލާ މިހެން ވިދާޅުވީ، ހައި ސްޕީޑް ފެރީ ނިޒާމު ”ރާއްޖެ ޓްރާންސްޕޯޓް ލިންކް“ އާރް.ޓީ.އެލްގެ ހިދުމަތް ރަސްމީކޮށް އިފްތިތާހު ކުރުމަށް ވަރޗުއަލްކޮށް ބޭއްވި ރަސްމިއްޔާތުގައެވެ.
ނަހުލާގެ ވާހަކައިގައި، ގައުމެއްގައި ބޮޑެތި ޕްރޮޖެކްޓުތަކެއް ހިންގިޔަސް، އެގައުމެއްގެ ދަތުރުފަތުރުގެ ނިޒާމު ވަރުގަދަ ނުވާ ކަމަށް ވާނަމަ، އެ ގައުމެއް ކުރިއަކަށް ނުދާނެއެވެ.
ރާއްޖޭގެ ރަށްތައް ގުޅާލާއިރު އެންމެ އިސްކަމެއް ދޭނީ ސަލާމަތާއި ރައްކާތެރިކަމާއި ފަސޭހަކަމާއެކު އެމީހެއްގެ ރަށަށް ވާސިލުވެވޭނެ އަވަސް ނިޒާމެއް ގާއިމުކުރުމަށް ކަމަށްވެސް އެކަމަނާ ވިދާޅުވިއެވެ.
މުޅި ރާއްޖެ ހައިސްޕީޑް ފެރީ ނިޒާމަކުން ގުޅާލުމަށް ސަރުކާރުން ހިންގާ މަޝްރޫޢުގެ ދަށުން ތަޢާރަފުކޮށްފައިވާ އާރް.ޓީ.އެލްގެ ހިދުމަތަކީ ރައްޔިތުންނަށް ލުއިފަސޭހަ ދަތުރުފަތުރުގެ ނިޒާމެއް ކަށަވަރުކޮށްދިނުމަށްޓަކާ ސަރުކާރުން ދޭން ފަށާފައިވާ މަޝްރޫޢެކެވެ.
ސަރުކާރުން މި ޕްރޮޖެކްޓް ކުރިއަށް ގެންދަނީ، ހަ ޒޯނެއް، އަދި ތިން ފިޔަވައްސަކަށް ބަހާލައިގެންނެވެ.
