ރާއްޖެއަށް މިހާރު ކުރަމުން އަންނަ ވިއްސާރާގައި އެކިއެކި ގެއްލުން ލިބުނުކަމުގެ ރިޕޯޓު ފަސް ރަށަކުން ލިބިފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ(އެންޑީއެމްއޭ)އިން ބުނެފިއެވެ.
އެންޑީއެމްއޭއިން ބުނިގޮތުގައި، ގެއްލުންވި ކަމުގެ ރިޕޯޓު ލިބިފައި ވަނީ ފ. ނިލަންދޫ، ކ.ގުރައިދޫ، ލ.ގަން އަދި ފޮނަދޫ އާއި ސ.މަރަދޫ އިންނެވެ.
ކ. ގުރައިދޫގެ 20 ގެއެއްގައި ފެންބޮޑުވުމާއިއެކު، ތިން ގެއެއްގެ މީހުން އެހެން ތަންތަނަށް ބަދަލުކޮށްފައިވާ ކަމަށް އެންޑީއެމްއޭ އިން ހާމަ ކުރެއެވެ.
ފެން ބޮޑުވުމުގެ ހާދިސާތަކަށް އިޖާބަ ދިނުމުގެ މަސައްކަތް ސިފައިންނާއި، ފުލުހުން އަދި ކައުންސިލްތައް ގުޅިގެން ދަނީ ކުރަމުންނެވެ.
މީގެ އިތުރުންވެސް މާލޭގެ ބައެއް ގޭގައި ފެންބޮޑުވެފައިވާތީ ވެލި ބަސްތާޖެހުމުގެ މަސައްކަތް މާލެ ސިޓީ ކައުންސިލުގެ އެހީތެރިކަމާއިއެކު ކުރަމުންދާ ކަމަށް އެ އިދާރާއިން މައުލޫމާތު ދިނެވެ.
މިއަދު ވެސް ބޯކޮށް ވާރޭ ވެހޭނެ ކަމަށް ލަފާކޮށް މޫސުމާ ބެހޭ ގައުމީ އިދާރާ (މެޓް) އިން ވަނީ ޖުމްލަ 13 އަތޮޅަކަށް ޔެލޯ އެލާޓު ނެރެފައެވެ.
އެލާޓު ނެރެފައި ވަނީ ނ. އަތޮޅުން ފެށިގެން ލ. އަތޮޅާ ހަމައަށެވެ. އެލާޓު ނެރެފައި ވަނީ މިއަދުގެ މެންދުރު 13:00 އިން 17:00އާ ހަމައަށެވެ.
މެޓުން ބުނީ އެވަގުތުތަކުގައި ބޯކޮށް ވާރޭ ވެހި ގުގުރާނެ ކަމަށް ލަފާ ކުރެވޭ ކަމަށެވެ. މީގެއިތުރުން ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެ ކަމަށް ވެސް މެޓުން ވަނީ ލަފާ ކޮށްފައެވެ.
