ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފަށައި، ހުއްޓިފައިވާ 32 މަޝްރޫޢުއެއްގެ މަސައްކަތް އަލުން ފަށާފައިވާ ކަމަށް ކޮންސްޓްރަކްޝަން މިނިސްޓްރީން ބުނެފިއެވެ.
ކޮންސްޓްރަކްޝަން މިނިސްޓަރު ޢަބްދުﷲ މުއްޠަލިބް މިފަދައިން ވިދާޅުވީ ސަރުކާރުގެ ބައެއް މަޝްރޫއުޢުއް ހުއްޓާލަމުން ގެންދާ ކަމަށް ޞާލިޙު ތުހުމަތު ކުރެއްވުމުންނެވެ.
އެކްސް ގައި ކުރެއްވި ޕޯސްޓެއްގައި މިނިސްޓަރު ވިދާޅުވީ ކުރީ ސަރުކާރު ނިމުނުއިރު ހަވާލުކޮށްފައިވާ މަޝްރޫޢުތަކުގެ ތެރެއިން ގިނަ މަޝްރޫއުތަކެއް އޮތީ ހުއްޓިފައިކަމަށެވެ.
އެގޮތުން އެމްޓީސީސީއާއި އާރްޑީސީއާ ހަވާލުކޮށްފައިވާ މަޝްރޫއުތަކުގެ ތެރެއިން 64 މަޝްރޫޢެއްގެ މަސައްކަތް ފެށުމަށްފަހު ކުރިއަށް ނުގެންގޮސް ހުއްޓިފައި އޮތްކަން ފާހަގަކުރައްވައި، އެ މަޝްރޫޢުތަކުގެ ތެރެއިން 32 މަޝްރޫޢެއްގެ މަސައްކަތް އަލުން ފަށާފައިވާކަމަށް ވިދާޅުވިއެވެ.
މިނިސްޓަރު ވިދާޅުވީ އެ މަޝްރޫޢުތަކުގެ އިތުރަށްވެސް އެ ދެކުންފުންޏާއެކު އެބަސްވުންތަކުގައި ސޮއިކުރުމަށްފަހު މަސައްކަތް ފެށިފައިނުވާ 83 މަޝްރޫއެއް އޮތްކަމަށެވެ.
އެގޮތުން ފެނަކަ އާއި އެމްޑަބްލިއުއެސްސީގެ އިތުރުން ވެސް ކުންފުނިތަކާ ޙަވާލުކުރެވިފައިވާ ވަރަށް ގިނަ މަޝްރޫޢުތައްވެސް ނުފެށި ހުއްޓިފައި ހުރިކަން ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިޢްޒު ކުރިން ވެސް ވިދާޅުވެފައި ވަނީ، އެމަނިކުފާނުގެ ވެރިކަމެއްގައި ޤައުމުގެ ތަރައްޤީއަށް ހިންގާ އެއްވެސް މަޝްރޫޢުއެއް ހުއްޓައިނުލައްވާނެ ކަމަށެވެ.
