ސޯޝަލް ސެންޓަރުގައި އޮފީހެއް ހަދައިގެން ސަރުކާރުން ކެމްޕެއިން ކުރާ ކަމަށް ބުނެ، އިދިކޮޅު ފަރާތްތަކުން ފަތުރާ ޚަބަރު އިލެކްޝަންސް ކޮމިޝަނުން ދޮގު ކޮށްފިއެވެ.
މިއަދު ކުރިއަށްދާ މާލެ ސިޓީގެ މޭޔަރު އިންތިޚާބުކުރުމާއި، އެ ކައުންސިލުގެ ތިން މެމްބަރަކު ހޮވުމަށް ކުރިއަށްދާ ބައި-އިލެކްޝަނަށް ނުފޫޒު ފޯރުވުމަށް ސަރުކާރުން ކެމްޕެއިންކުރަމުންދާ ކަމަށް އިދިކޮޅު އެމްޑީޕީން ވަނީ ތުހުމަތުކޮށްފައެވެ.
މި އިންތިޚާބުގައި ވާދަކުރާ ވަކި ކެންޑިޑޭޓަކަށް ތާއީދު ހޯދުމަށް ސޯޝަލް ސެންޓަރުގައި ހުރި އޮފީހެއްގެ ތެރެއިން މަސައްކަތްކުރާކަމަށް ބުނެ އެމްޑީޕީން ދަނީ ފޮޓޯ އާއި ވީޑިއޯތަކެއް ވެސް އާއްމު ކުރަމުންނެވެ.
މިކަމާ ގުޅިގެން އިލެކްޝަންސް ކޮމިޝަން(އީސީ) އިން މިއަދު ބުނެފައިވަނީ އެ އޮފީހަކީ ޔޫތު މިނިސްޓްރީގެ ބައެއް މަސައްކަތްތައް ހިންގުމަށް ބޭނުންކުރަމުން އަންނަ އޮފީހެއްކަން އެނގިފައިވާ ކަމަށެވެ.
އަދި އެ އޮފީހުގައި ކުރަމުން އަންނަނީ ޔޫތު މިނިސްޓްރީގެ މަސައްކަތްތައް ކަމަށް ވެސް އީސީން ބުންޏެވެ.
އަދި ތަނުގައި ކެމްޕެއިނާ ގުޅޭ އެއްވެސް މަސައްކަތެއް ނުކުރާކަން ޔޫތު މިނިސްޓްރީން ވަނީ އަންގައިފައެވެ.
މިއަދުގެ އިންތިޚާބުގައި، މާލޭގެ މޭޔަރު ކަމަށް ސަރުކާރުގެ ފަރާތުން ވާދަ ކުރައްވަނީ ޢައިޝަތު ޢާޒިމާ ޝަކޫރެވެ. އިންތިޚާބުގެ ވޯޓުލުން ހަވީރު 5:00 އާއި ހަމައަށް ކުރިއަށް ދާނެއެވެ. ޢާޒިމާ ވަނީ ވީހައިވެސް އަވަހަށް ވޯޓުލާން ނުކުތުމަށް އެދިލައްވައިފައެވެ.
