ގއ. ވިލިނގިލިން ޙާލު ސީރިއަސްވެގެން މާލެ ގެނެސް ފަރުވާ ދެމުންދަނިކޮށް މިއަދު ނިޔާވި ކުއްޖާ ނިޔާވި މައްސަލަ ރައްޔިތުންގެ މަޖިލިހަށް ހުށަޅުއްވާނެ ކަމަށް ރައްޔިތުންގެ މަޖިލިހުގެ ވިލިނގިލި ދާއިރާގެ އެމްޑީޕީގެ މެމްބަރު ސައުދު ޙުސެއިން ވިދާޅުވެއްޖެއެވެ.
ގއ. ވިލިގިލީގައި ހުންނަ އަތޮޅު ހޮސްޕިޓަލުގައި ވެންޓިލޭޓަރުގައި ފަރުވާ ދިނުމަށްފަހު، އެމަޖެންސީކޮށް، ވައިގެ މަގުން މާލެ ގެނައި ކުއްޖާ ނިޔާވީ ފަރުވާ ދެމުން ދަނިކޮށް އިއްޔެ ވަގުތެއްގައެވެ. އެކަން ހިނގައިދިޔަ ގޮތް ބަޔާންކޮށްދީ، އާސަންދައިން ރޭގެ ވަގުތެއްގައި ބަޔާނެއް ވެސް ނެރުނެވެ.
ރައީސް އޮފީހުން ވިދާޅުވި ގޮތުގައި، އުމުރުން 13 އަހަރުގެ ޖާހުގެ ޞިއްޙީ ހާލަތު ސީރިއަސްވެ، އިތުރު ފަރުވާ ދިނުމަށް ވިލިނގިލިން މާލެ ސިޓީއަށް ގެނައުމުގެ ކަންކަން ހިނގައިދިޔަ ގޮތުގެ ތަފުޞީލީ މަޢުލޫމާތު ދެއްވުމަށާއި، މިފަދަ ހިތާމަވެރި ހާދިސާއެއް ތަކުރާރު ނުވާނޭގޮތަށް، ބަލި މީހުން ކުއްލި ފަރުވާއަށް ގެނެސްދިނުމުގައި ޢަމަލުކުރަމުން އަންނަ ނިޒާމު އިޞްލާޙުކުރުމަށް، ރައީސް ޑރ.މުޙައްމަދު މުޢިއްޒު ވަނީ ކަމާ ގުޅުން ހުރި ސަރުކާރުގެ ހުރިހައި އިދާރާތަކަށް އަންގަވައިފައެވެ.
އަދި، ބަލި ޙާލަތެއް މެދުވެރިވެގެން، އިތުރު ފަރުވާ ދިނުމަށް، ވައިގެ މަގުން ބަލި މީހަކު ގެނެސްދޭންޖެހޭ އެއްވެސް ޙާލަތެއްގައި، އާސަންދަ ފަދަ އިދާރާތަކުން ކަންކަން ހަމަޖެހެންދެން މަޑުނުކުރައްވައި، ޞިއްޙީ ފަރުވާދޭ ތަނަކުން އެފަދަ ކަމަކަށް އެދުމާއެކު، ވީ އެންމެ އަވަހަކަށް ބަލިމީހާ ގެނެސްދިނުމަށް އިސްކަން ދިނުމުގެ އުޞޫލެއް ކަނޑައަޅައި، އެގޮތަށް އައިލެންޑް އޭވިއޭޝަނުން އަބަދުވެސް ޢަމަލުކުރަމުން ގެންދެވުމަށް ރައީސް މުޢިއްޒު ވަނީ އިއްޔެ އެދިވަޑައިގެންފައެވެ.
