ރައްޔިތުންގެ މަޖިލީހުގެ މައިނޯރިޓީ ޕާޓީ އަކީ ސަރުކާރު ހިންގާ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) ކަމަށް ރައްޔިތުންގެ މަޖިލީހުގެ މިއަދުގެ ޖަލްސާގައި އިއުލާންކޮށްފިއެވެ.
ރައްޔިތުންގެ މަޖިލީހުގެ ރައީސް މުޙައްމަދު އަސްލަމް މިއަދު އިޢުލާންކުރެއްވި ލިސްޓްގައި އެމްޑީޕީން ވަކިވެވަޑައިގެން ޕީއެންސީއަށް ސޮއިކުރައްވާފައިވާ މަރަދޫ ދާއިރާގެ މެންބަރު އިބްރާހީމް ޝަރީފާއި، އިނގުރައިދޫ ދާއިރާގެ މެންބަރު ޙަސަން އަޙްމަދު (ހަސަންޓޭ)ގެ ނަމެއް ނުހިމެނެއެވެ.
މަޖިލީހުގެ އިދާރާ އިން ބުނީ މި ދެ މެންބަރުން ޕާޓީ ބަދަލުކުރެއްވި ނަމަވެސް މަޖިލީހުގައި އެކަން އިއުލާންކުރުމަށް ބޭނުންވާ ލިޔެކިޔުންތައް އޭރު މަޖިލީހަށް ލިބިފައި ނުވާ ކަމަށެވެ.
ނަމަވެސް ޕާޓީ ބަދަލުކުރެއްވި 12 މެންބަރެއްގެ ނަން މިއަދު އިއުލާން ކުރި ފަހުން ޝަރީފާއި ހަސަންގެ މައުލޫމާތުތައް ލިބިފައިވާ ކަމަށްވެސް ބުންޏެވެ.
އެމްޑީޕީ ދޫކޮށް ޕީއެންސީއާއި ގުޅިވަޑައިގެންނެވީ މަރަދޫ ދާއިރާގެ މެންބަރު އިބްރާހީމް ޝަރީފާއި އިނގުރައިދޫ ދާއިރާގެ މެންބަރު ހަސަން އަހްމަދު (ހަސަންޓޭ) އާއި ނިލަންދޫ ދާއިރާ މެންބަރު އަބްދުލްމުހްސިން ހަމީދާއި، ފޭދޫ ދާއިރާގެ މެންބަރު މުހައްމަދު ނިހާދާއި، އިސްދޫ ދާއިރާގެ މެންބަރު އަލީ ހަމީދާއި މައްޗަށްގޮޅި ދެކުނު ދާއިރާގެ މެންބަރު އަހްމަދު ހައިތަމް އާއި ކުރެންދޫ ދާއިރާގެ މެންބަރު އަބްދުލްޣަނީ އަބްދުލް ޙަކީމް އާއި ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމް އާއި މަތިވެރި ދާއިރާގެ މެންބަރު ހަސަން ޒަރީރާއި މުލަކު ދާއިރާގެ މެންބަރު އިބްރާހީމް ނަސީރާއި މާފަންނު ދެކުނު ދާއިރާގެ މެންބަރު އާދަމް އަލީ އާއި ކޮމަންޑޫ ދާއިރާގެ މެންބަރު މުހައްމަދު ރާޝިދާއި ތޮއްޑޫ ދާއިރާގެ މެންބަރު ހަސަން ޝިޔާން އާއި ގުރައިދޫ ދާއިރާގެ މެންބަރު އިބްރާހީމް ޝާޒްއެވެ.
މަޖިލީހުގައި މިއަދު ކުރި އިއުލާނާ އެކު ޕީއެންސީގައި މިހާރު ތިއްބެވީ 16 މެންބަރުންނެެވެ. އެމްޑީޕީގައި 42 މެންބަރުން ތިއްބެވިއިރު ޑިމޮކްރެޓްސްގައި މިހާރު ތިއްބެވީ 13 މެންބަަރުންނެވެ. ޖުމްހޫރީ ޕާޓީ، ޕީޕީއެމް އަދި އެމްޑީގެ ތެރެއިން ކޮންމެ ޕާޓީއެއްގައި ދެ މެންބަރުން ތިއްބެވިއިރު މިނިވަން މެންބަރުންގެ ގޮތުގައި ތިއްބެވީ ތިން މެންބަރުންނެވެ. މިނިވަން މެންބަރުންގެ ގޮތުގައި ތިއްބެވި ދެ ބޭފުޅުންނަކީ އެމްއެންޕީގެ ދެ ބޭފުޅުންނެވެ.
