ކަރަންޓު ކުންފުނި، ސްޓެލްކޯގެ މުވައްޒަފުންނަކީ ކޮރަޕްޝަނާ ދެކޮޅު، އިޙްލާސްތެރި މުވައްޒަފުންނަށް ހެދުމަކީ ވަރަށް ބޮޑު އަމާޒެއް ކަމަށް އެ ކުންފުނީގެ މެނޭޖިން ޑިރެކްޓަރު ޙުސައިން ފަހުމީ ވިދާޅުވެއްޖެއެވެ.

Ads by Asuru

އެކްސްގައި އޭނާ މިއަދު ކުރެއްވި ޕޯސްޓެއްގައި ފަހުމީ މިގޮތަށް ވިދާޅުވީ ސްޓެލްކޯގެ މުވައްޒަފުން ކޮރަޕްޝަނާއި ދެކޮޅަށް ހޭލުންތެރި ކުރުވުމަށާއި، ދެފަރާތް ގުޅިގެން ކޮރަޕްޝަނާއި ދެކޮޅަށް ކުރެވިދާނެ މަސައްކަތްތަކާއި މެދު މަޝްވަރާ ކުރެއްވުމަށް އެންޓި ކޮރަޕްޝަން ކޮމިޝަން(އޭސީސީ)ގެ އިސްވެރިންނާއި، އެ ކުންފުނީގެ އިސްވެރިން މިއަދު ބައްދަލު ކުރައްވާފައި ވަނިކޮށެވެ.

”މާތްﷲގެ އިރާދަފުޅާއި، ވާގިފުޅާއެކު ސްޓެލްކޯއަކީ ކޮރަޕްޝަނާއި ދެކޮޅަށް މަސައްކަތްކުރާ، އިޚުލާސްތެރި އަދި ނަމޫނާ މުވައްޒަފުންތަކެއް މަސައްކަތް ކުރާ ކުންފުންޏަކަށް ހެދުމަކީ އަޅުގަނޑުގެ ވަރަށް ބޮޑު އަމާޒެއް.“ އެމްޑީ ފަހުމީ ވިދާޅުވިއެވެ.

އޭނާ މިގޮތަށް ވިދާޅުވިއިރު، ކޮރަޕްޝަން ނައްތައިލުމަކީ ވަރަށް ބޮޑު އިސްކަމެއް ދެއްވާނެ ކަމެއް ކަމުގައި، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުން ވިދާޅުވެފައިވެއެވެ.

ރިޔާސީ އިންތިޚާބުގެ ކެމްޕެއިން ދުވަސްވަރު ރައީީސް މުޢިއްޒު ވިދާޅުވެފައި ވަނީ އެމަނިކުފާނުގެ ސަރުކާރުގައި ތިއްބަވާނީ އިހްލާސްތެރިން ކަމަށާއި ކޮރަޕްޝަނަށް ޖާގަ ނުދެއްވާނެ ކަމަށެވެ.

އަޅުގަނޑުގެ ސަރުކާރެއްގައި ކޮރަޕްޝަނަށް މަގުފަހިވާ ފަދަ އެއްވެސް ކަމެއް ކުރުމުގެ ފުރުސަތު ނުދޭނަން. އެކަންކުރާ ފަރާތެއް ފާހަގަވެއްޖިއްޔާ އަޅުގަނޑު އިސްވެ އެކަމަށް ފިޔަވަޅު އަޅާނީ. އިހުލާސްތެރި ތެދުވެރި މަސައްކަތެއް ކުރަން ނޫނިއްޔާ ނާދެވޭނެ” ކެމްޕެއިން ހަރަކާތެއްގައި ރައީސް މުޢިއްޒު ވިދާޅުވެފައިވެއެވެ.