ރާއްޖޭގައި ވިއްކާ ކާބޯތަކެތީގެ އަސާސީ ބާވަތްތަކުގެ އަގުތައް ކުޑަކުރުމަށް ރާއްޖޭގެ އެކި ސަރަހައްދުތަކުގައި ގުދަންކުރުމުގެ ޤާބިލުކަން އިތުރުކުރުމަށް ސަރުކާރުން ނިންމައިފިއެވެ.
މިއަދު އޮތް ވަޒީރުންގެ މަޖިލީހުގެ ބައްދަލުވުމުގައިވަނީ ދިރިއުޅުމުގެ އަގުތައް ދަށްކުރުމުގެ ގޮތުން އަސާސީ ޚިދުމަތްތަކާއި މުދަލުގެ އަގުތައް ކުޑަކުރުމަށް ފިޔަވަޅުތަކެއް އެޅުމަށް ވަޒީރުންގެ މަޖިލީހުގެ ލަފާފުޅާ އެއްގޮތަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވެއެވެ.
އިކޮނޮމިކް މިނިސްޓްރީން ހުށަހެޅި ކަރުދާހަކާ ގުޅިގެން ރައީސް ނިންމަވާފައިވާ ނިންމެވުންތަކުގެ ތެރޭގައި ޔުޓިލިޓީ ކުންފުނިތަކުން ހަކަތަ އުފެއްދުމަށް ތެޔޮ ބޭނުންކުރާ މިންވަރު މަދުކޮށް އިއާދަކުރަނަވި ހަކަތައި އުފައްދާ މިންވަރު އިތުރުކުރުމަށް ކުރުރާސްތާ އަދި މެދުރާސްތާ ޕްލޭންުތަކެއް އެކުލަވައިލަން މިނިސްޓްރީ އޮފް ކްލައިމެޓް ޗޭންޖު، އެންވަޔަރަމެންޓު އެންޑް އެނާޖީއާ ހަވާލުކުރުމަށް ނިންމާފައިވެއެވެ.
އޭގެ އިތުރަށް ރައްޔިތުން ބޭނުންވާ އަސާސީ ކާބޯތަކެތީގެ އަގުތައް ކުޑަކުރުމަށްޓަކައި ސިޔާސަތުތަކެއް އެކުލަވައިލެއްވުމަށް ރައީސްވަނީ ނިންމަވާފައިވެއެވެ. އެގޮތުން ރާއްޖޭގެ އެކި ކަންކޮޅުތަކުގައި ގުދަންކުރުމުގެ ޤާބިލުކަން އިތުރުކުރުމަށް ސިޔާސަތުތަކެއް އެކަށައެޅުއްވުމަށް ރައީސްވަނީ ނިންމަވާފައެވެ.
އެގޮތުން ރާއްޖޭގެ އެކި ސަރަހައްދުތަކުގައި ކޯލްޑް ސްޓޮރޭޖު ޤާއިމުކުރާނެ ސަރަހައްދުތައް ކަނޑައަޅައި، އިކޮނޮމިކް ކައުންސިލަށް ހުށަހެޅުމަށް ރައީސް ނިންމެވިއެވެ. އަދި އެތަންތަނުގައި މަސައްކަތް ކުރިއަށްގެންދެވޭނެ އެންމެ ރަނގަޅު މޮޑެލްތަކުގެ މައުލޫމާތު އެސްޓީއޯއިން އިކޮނޮމިކް ކައުންސިލަށް ހުށަހެޅުމަށް ރައީސް ނިންމިއެވެ.
އަދި މިހާރު ރާއްޖޭގައި ޤާއިމުކޮށްފައިވާ ވިޔަފާރި ބަނދަރުތަކުން ނަގަމުންދާ ފީތައް މުރާޖައާކުރުމާމެދު އެމްޕީއެލްއިން ފެންނަ ގޮތެއް އިކޮނޮމިކް ކައުންސިލަށް ހުށަހެޅުމަށްވެސް ރައީސް ނިންމަވާފައިވެއެވެ.
