ވަޒީރުންނަށް ރުހުން ނުދިނުމަކީ ރައްޔިތުންގެ ނިންމުމަށް މުތުލަގަށް ހުރަސް އެޅުން ކަމަށް ނައިބު ރައީސް ހުސައިން މުހައްމަދު ލަތީފު ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ ތިން ވަޒީރަކަށް ރުހުން ނުދިނުމަށް ރައްޔިތުންގެ މަޖިލީހުން މިއަދު ނިންމުމާއި ގުޅިގެން،އެކްސްގައި ކުރެއްވި ޕޯސްޓެއްގައެވެ.
ނައިބު ރައީސް ހުސައިން ވިދާޅުވީ ރައްޔިތުންގެ މަޖިލީހުން މިއަދު ފެނިގެންދިޔައީ ޑިމޮކްރެސީގެ އަސްލުތަކާއި ބީރައްޓެހި މަންޒަރެއްކަމަށެވެ.
އެމަނިކުފާނު ވަނީ، ވަޒީރުންނަށް ރުހުން ނުދޭން ނިންމި ނިންމުން އަލުން މުރާޖާކޮށް، އިސްލާހުކުރައްވާނެކަމަށް އުންމީދުކުރައްވާކަމަށް ވެސް ވިދާޅުވެފައެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި އިދިކޮޅު އެމްޑީޕީއާއި ދަ ޑިމޮކްރެޓްސް ޕާޓީން ރުހުންނުދިނީ ބަންޑަރަނައިބު އަޙްމަދު އުޝާމައި އިސްލާމިކް އެފެއާޒް މިނިސްޓަރު ޑރ.މުޙައްމަދު ޝަހީމް އަލީ ސައީދާއި ހައުސިން އެންޑް އާބަން ޕްލޭނިން މިނިސްޓަރު ޑރ.އަލީ ހައިދަރަށެވެ.
އެ ތިން ބޭފުޅުންނަށް ރުހުންނުދިނުމާއެކު އެ ބޭފުޅުން ކެބިނެޓުން ވަކިވެވަޑައިގަތުމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވަނީ އެ ބޭފުޅުން އަލުން އެ މަޤާމުތަކަށް އައްޔަންކުރެއްވުމަށެވެ.
މިއަދު ރައީސް އޮފީހުގައި އޮތް ރަސްމިއްޔާތެއްގައި އެ ތިން ބޭފުޅުން އަލުން ވަޒީރުކަމުގެ ހުވައިކުރައްވާފައިވެއެވެ.
