”ގެދޮރުވެރިޔާ“ ސްކީމްގެ ދަށުން ދޫކުރުމަށް ނިންމި 4000 ފްލެޓް ހަވާލުކުރުމުގެ މަސައްކަތް ކުރިއަށްގެން ދިއުމަށް އެންޓި ކޮރަޕްޝަން ކޮމިޝަން(އޭސީސީ) އިން ހުއްދަ ދީފިއެވެ.
އޭސީސީން އަންގައިގެން ފްލެޓް ޙަވާލުކުރުމުގެ މަސައްކަތް ޕްލޭނިން މިނިސްޓްރީން އޮތީ ހުއްޓާލާފައެވެ.
އެގޮތަށް އޭސީސީން އޭރު އެންގީ ނިމިދިޔަ ސަރުކާރުން އެކަންކުރުމުގައި އުސޫލުތަކާއި ހިލާފުވެފައިވާކަމަށް ބުނެ ގިނަ ބަޔަކު ކަންބޮޑުވުން ފާޅުކުރުމުންނެވެ.
އޭސީސީން މިއަދު ބުނީ ގެދޮރުވެރިޔާ ސްކީމްގެ ދަށުން އިއުލާނު ކުރި ފުލެޓްތަކާ ގުޅިގެން، އެ ކޮމިޝަނުން ބަލަމުންދާ މައްސަލައިގައި ފުލެޓު ދޫކުރުމާއި ގުޅޭ އެންމެހާ މަސައްކަތްތައް ހުއްޓާލުމަށް ޕްލޭނިން މިނިސްޓްރީއަށް އަންގާފައިވާ އެންގުން ނިމުމަކަށް ގެނެސްފައިވާކަމަށެވެ.
އަދި ފުލެޓު ދޫކުރުމާ ގުޅޭ ކަންކަން ކުރިއަށް ގެންދިއުމުގައި ވަކި ކަންތައްތަކަކަށް ބަލައި، ޢަމަލުކުރުމަށް އެ މިނިސްޓްރީއަށް އަންގާފައިވާކަމަށްވެސް އޭސީސީން ބުނެއެވެ.
ސަރުކާރުން ވަނީ ފަހި ދިރިއުޅުން ކޯޕަރޭޝަނުން ހުޅުމާލޭގައި ހަދަމުންދާ ފްލެޓުތައް ލިބޭ މީހުންގެ ލިސްޓާ ގުޅޭގޮތުން އޭސީސީން ބަލަމުންދާ ކަންކަން ނިމޭތާ، ތިން ދުވަހުގެ ތެރޭގައި އެއްބަސްވުމުގައި ސޮއިކުރަން ފަށާނެކަމަށް ބުނެފައެވެ.
