އިޤްތިޞާދީ ގޮތުން ތަދު އަހަރުތަކަކަށްފަހުގައި، ކުރިއަށް އޮތީ އުޖާލާ މުސްތަޤްބަލެއް ކަމަށް ޤަބޫލުކުރެއްވޭ ސަބަބުތައް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
މި އަހަރަށް ރައްޔިތުންގެ މަޖިލިސް ހުޅުވައިދެއްވަވައި، ރިޔާސީ ބަޔާން އިއްވަވަމުން ރައީސް މުޢިއްޒު ވިދާޅުވީ، އިޤްތިޞާދީ ގޮތުން ގުނަން ޖެހުނު ތަދު އަހަރުތަކަށްފަހުގައި، އެ ޙާލަތުން އަރައިގަތުމަށް ސަރުކާރުން ރެއާއި ދުވާލު މަސައްކަތް ކުރަމުން އަންނަ ކަމަށެވެ.
ދައުލަތުގެ މާލިއްޔާއަށް ބުރާ ނުވާނެ ގޮތަށް އައު މަޝްރޫޢުތައް ފެށުމަށް ސަރުކާރުން އަންނަނީ މަސައްކަތްތަކެއް ކުރަމުން ކަމަށް އެމަނިކުފާނު ވިދާޅުވިއެވެ.
އެގޮތުން ދައުލަތުގެ ކުންފުނިތަކުން އަރަނިވާނެ ގޮތްތަކާއި، ދަރަނި ކުޑަކޮށް، ލުއި ކުރެވޭނެ ގޮތްތައް ވެސް ހޯދަމުން އަންނަ ކަމަށް ވެސް ރައީީސް ވިދާޅުވިއެވެ.
”އެއްވެސް ހަމައެއް ލަމައެއް ނެތި، ދައުލަތުގެ ހަޒާނާއިން އެކި ފަރާތްތާކަށް ބަދަލުދޭން އުފައްދާފައި އޮތް ސެޓްލްމަންޓް ކޮމިޓީ މިހާރު ވާނީ އުވާލާފަ. ސޮވްރިން ފަންޑަށް އަލުން ޑޮލަރު ޖަމާކުރަންވެސް ފަށައިފިން. ބޭރު ފައިސާ ޤައުމުގައި ހިފެހެއްޓޭނެ އާ ގޮތްތައް ވެސް މިދަނީ ހޯދަމުން.“
ރައީސް ވަނީ މި އަހަރު ރާއްޖެއަށް، ފުރަތަމަ ފަހަރަށް ދެ މިލިއަން ފަތުރުވެރިން ޒިޔާރަތް ކުރާނެކަމަށް ވެސް އަންދާޒާ ކުރެވޭ ކަމަށް ވިދާޅުވެފައެވެ.
ވީއައިއޭ ތަރައްޤީކޮށް ނިމި، އައު އެއާލައިންތަކަށް ރާއްޖެއަށް ދަތުރު ކުރުމުގެ ފުރުޞަތު ދެވުމުން، މެދުރާސްތާގައި، ރާއްޖެއަށް ފަތުރުވެރިން އަންނަ އަދަދު އަހަރަކު އެވްރެޖްކޮށް 10.3 އިންސައްތައަށް ކުރިއަރާނެ ކަމަށް ބެލެވޭ ކަމަށް ރައީސް ވިދާޅުވިއެވެ.
އިޤުތިޞާދު ސިންދަފާތު ކުރުމަށް ކުރާ މަސައްކަތުގައި، ރާއްޖެއަށް އެންމެ ބޮޑު ”ކޮމްޕެރެޓިވް އެޑްވާންޓޭޖް“ ލިބިފައިވާ ފަތުރުވެރިކަމުގެ ސިނާޢަތް ވެސް ސިންދަފާތު ކުރަންޖެހޭކަން ރައީީސްގެ ވާހަކަފުޅުގައި ފާހަގަކުރެއްވިއެވެ.
އެގޮތުން އައު މާކެޓްތަކަށް، ދަތުރުފަތުރުން ސީދާ ރާއްޖެއާ ގުޅުވައިލުމާއި، ލޯންގްހޯލް ރޫޓްތައް އިތުރު ކުރަން މަސައްކަތް ކުރަމުން އަންނަ ކަމަށް ރައީީސް ވިދާޅުވިއެވެ. އަދި ފަތުރުވެރިކަމުގެ ދާއިރާގެ އައު އުފެއްދުންތައް ތަޢާރަފުކުރުމުގެ މަސައްކަތް ވިޒިޓަރ އޮކޮނޮމީ ކައުންސިލުގެ ބެލުމުގެ ދަށުން ދަނީ ކުރެވެމުން ކަމަށް ވެސް އެމަނިކުފާނު ވިދާޅުވިއެވެ. ރައީީސް އިތުރަށް ވިދާޅުވީ، މި ބަދަލުތަކުގެ ސަބަބުން ފަތުރުވެރިކަމަށް ލިބޭނެ ކުރިއެރުމުގެ އިތުރުން އިމާރަތް ކުރުމާއި ރިއަލްއެސްޓޭޓް އަދި ދަތުރުފަތުރު ފަދަ ދާއިރާތައް ވެސް ކުރިއަރަމުންދާނެކަމަށެވެ.
