ރާއްޖޭގައި އިޔާދަ ކުރުވަނިވި ހަކަތަ ބޭނުންކުރާ ނިސްބަތް 33 އިންސައްތައަށް އިތުރު ކުރުމުގެ އަމާޒު، މި ދައުރުގައި ކާމިޔާބު ކުރައްވާނެ ކަމަށް ސްޓެލްކޯގެ މެނޭޖިން ޑިރެކްޓަރު ޙުސައިން ފަހުމީ ވިދާޅުވެއްޖެއެވެ.

Ads by Asuru

ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ހަކަތައިގެ ސިނާއަތުގެ މައި ކުންފުނީގެ ޙައިޞިއްޔަތުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުން އެކަށައަޅުއްވާފައިވާ އިއާދަކުރަނިވި ހަކަތައިގެ ސިޔާސަތުތައް އޭގެ އެންމެ ފުރިހަމަ މާނައިގައި ތަންފީޒު ކުރެވި، ތިމާވެއްޓަށާއި، ރައްޔިތުންނަށް އޭގެ ފައިދާއާއި މަންފާ ލިއްބައިދިނުމަށް ކުރެވެން ހުރި ހުރިހާ މަސައްކަތެއް ސްޓެލްކޯއިން ކުރަމުން ގެންދާނެ ކަމުގެ ޔަޤީންކަން އަރުވާ ކަމަށެވެ.

”އަދި މި ވަގުތުވެސް މި ދެންނެވި ސިޔާސަތުތައް ތަންފީޒުކުރުމަށް ސްޓެލްކޯގެ މުވައްޒަފުން ކެނޑިނޭޅި މަސައްކަތް ކުރަމުން ގެންދާކަމީ މިކަން ކާމިޔާބު ވާނެކަމުގެ ރަމްޒެއް. މާތްﷲ ގެ އިރާދަފުޅާއި ވާގިފުޅާއެކު 33 އިންސައްތަ އިއާދަކުރަނިވި ހަކަތައިގެ އަމާޒު އަޅުގަނޑުމެން މި ދައުރުގެ ތެރޭގައި ކާމިޔާބު ކުރާނަން!“ ފަހުމީ ވިދާޅުވިއެވެ.

ފަހުމީ މިހެން ވިދާޅުވީއިރު، ތިމާވެއްޓާ ރައްޓެހި އިޔާދަ ކުރުވަނިވި ހަކަތަ ރާއްޖޭގައި ބޭނުންކުރާ މިންވަރު، ހަތަރު އިންސައްތައިން 33 އިންސައްތައަށް މި ދައުރުގައި އިތުރު ކުރުމަކީ ސަރުކާރުގެ އަމާޒެއް ކަމަށް ރައީސް ޑރ.މުޙައްމަދު މުޢިއްޒު، ރިޔާސީ ބަޔާން އިއްވަވަމުން ވަނީ ވިދާޅުވެފައެވެ.