ފުވައްމުލަކު ސިޓީގެ މަސްވެރިންނަށް ބޭނުންވާ ގިނަ ކަންކަމާ ގުޅޭގޮތުން، އެ ސިޓީގެ ކައުންސިލާއިއެކުގައި ފިޝަރީޒް މިނިސްޓްރީން މަޝްވަރާ ކޮށްފިއެވެ.
ފިޝަރީޒް މިނިސްޓްރީގެ ސްޓޭޓް މިނިސްޓަރު މުޙައްމަދު މުއްތަލިބާއި ސްޓޭޓް މިނިސްޓަރ ޑރ.އަމްޒަތު އަޙްމަދު ވަނީ އެ ސިޓީގެ ކައުންސިލް ބޭފުޅުންނާ ބައްދަލުކުރައްވައި، ފުވައްމުލަކު ސިޓީގައި ޤާއިމްކޮށްފައިވާ އައިސް ޕްލާންޓް ހުއްޓިފައިވާ މައްސަލައަށް ޙައްލެއް ހޯދުމާއިގުޅޭ ގޮތުންނާއި މަސް ރައްކާ ކުރާ ފެސިލިޓީއެއް ޤާއިމުކުރުމާއި ބެހޭގޮތުން މަޝްވަރާކުރައްވައިފައެވެ.
”މީގެ އިތުރުން އެ ރަށުގައި ގާއިމު ކުރަމުންދާ މަސްމާރުކޭޓުގެ މަސައްކަތާބެހޭ އެންމެ ފަހުގެ މަޢުލޫމާތުތައް ހިއްސާކުރެއްވުމުގެ އިތުރުން އެރަށުގައި މެރިން ރިސާޗް ސެންޓަރެއް އެޅުމާއިބެހޭ ގޮތުން ވެސް މަޝްވަރާކުރެއްވި.“ މިނިސްޓްރީން ބުންޏެވެ.
އަދި ރަށުގައި ދިރިއުޅެމުންދާ މަސްވެރިންނަށް އަމާޒުކޮށް ޓެރއިނިންގ ޕްރޮގްރާމްތައް ހިންގުމާއި އޮއެވާލި ކަނދުފަތިތަކުގެ ތެރެއިން ކަނޑައިގެން ގޮސްފައިވާ ކަނދުފަތިތައް އަލުން އެޅޭނެ މުއްދަތަކާ ބެހޭގޮތުންވެސް މަޝްވަރާކުރެއްވިއެވެ.
މީގެ އިތުރުން ސަރުކާރުގެ ހަފްތާ 14 މަގުޗާޓުގައި ހިމެނޭ އެ ވުޒާރާގެ މަސައްކަތްތައް ކުރިއަށްދާގޮތުގެ މައުލޫމާތު ހިއްސާކުރެއްވި ކަމަށް ވެސް ފިޝަރީޒް މިނިސްޓްރީން ބުނެއެވެ.
