ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވެރިކަމުގެ ފަސް އަހަރު ނިމޭއިރު، ތ.އަތޮޅުގައި އިތުރު ރިސޯޓުތަކެއް ހުޅުވިގެންދާނެކަމުގެ ޔަޤީންކަން އެމަނިކުފާނު ދެއްވައިފިއެވެ.

Ads by Asuru

ރައީސް އޮފީހުން ކުރިއަށް ގެންދާ ”ރައީީސްގެ ޖަވާބު“ ސިލްސިލާގެ ތެރެއިން، ތ.ވޭމަންޑޫގެ ޒުވާނަކު ވަނީ ފަތުރުވެރިކަން ފުޅާވެ، އެ އަތޮޅުގައި އިތުރު ރިސޯޓު ހުޅުވިގެންދާނެތޯ ރައީީސްއާ ސުވާލު ކޮށްފައެވެ. އެ ޒުވާނާ ވަނީ އެ އަތޮޅުގައި ވަނީ އެންމެ ރިސޯޓެއްކަން ވެސް ފާހަގަކޮށްފައެވެ.

އޭނާގެ ސުވާލުގެ ޖަވާބުގައި ރައީސް މުޢިއްޒު ވިދާޅުވީ، ޒުވާނުންނަށާއި، އެކި އުމުރުފުރާގެ މީހުންނަށް އާމްދަނީ ލިބޭނެ ގޮތްތައް ފަހިކޮށްދޭން ސަރުކާރުން ބޭނުންވާ ކަމަށާއި، ފަތުރުވެރިކަމުގެ ސިނާއަތުން އެކަން ކޮށްދިނުމަށް ވަރަށް ބޮޑު އިސްކަމެއް ދެއްވާ ކަމަށެވެ.

”މި މަސައްކަތް ކުރަނީ، މި އަތޮޅަށް ގިނަ ރިސޯޓްތަކެއް އިރާދަކުރެއްވިއްޔާ، މި ދައުރުގެ ތެރޭގައި ހަމަ ގެންނާނަން. ވަރަށް ޔަޤީންކަންދެން އިނގޭތޯ.“ ރައީސް ވިދާޅުވިއެވެ.

ތ.ގުރައިދޫ އަދި ވިލުފުށީގައި ސަރުކާރުން އެއާޕޯޓު އަޅާނެކަން ފާހަގަކުރައްވައި ރައީސް ވިދާޅުވީ، އެކަމުގެ ސަބަބުން ކަނެކްޓިވިޓީ އިތުރު ވެގެންދާނެ ނަމަށެވެ. އަދި ރާއްޖޭގެ މުޅި އިޤްތިޞާދަށް ގެންނަން އުޅޭ ކުރިއެރުމުގެ ސަބަބުން ރާއްޖެއަށް އަންނަ ފަތުރުވެރިންގެ ައަދަދު ވެސް ވަރަށް ބޮޑަށް އިތުރު ވެގެންދާނެ ކަމަށް ރައީސް ވިދާޅުވިއެވެ. ރައީސް ދެއްވި ޖަވާބުގައި ވެލާނާ އިންޓަރނޭޝަނަލް ތަރައްޤީ ކުރުމަށް، ފަށާފައިވާ މަޝްރޫޢުއަށް އަލިއަޅުވާލައި، އެއީ ވެސް ރާއްޖެއަށް އަންނަ ފަތުރުވެރިން އިތުރުވާނެ ކަމެއް ކަމުގައި ވިދާޅުވިއެވެ.

”މި އަތޮޅަށް އިރާދަކުރެއްވިއްޔާ، ވަރަށް ޔަޤީން، މި އަހަރު ވެސް ފެށޭވަރުވާނެ.“

ރައީސް ވިދާޅުވީ މި ފަސް އަހަރަށް ބަހާލައިގެން ގިނަ ރިސޯޓުތަކެއް މުޅި ތ. އަތޮޅުގެ އެކި ހިސާބަށް، އެކި ދާއިރާތަކުގައި ވެސް އަޅާނެ ކަމަށެވެ.

ރައީސްގެ ވިސްނުންފުޅަކީ ރާއްޖޭގައި މީހުން ދިރިއުޅޭ ރަށްރަށާއި ކައިރީގައި ރިސޯޓުތައް ތަރައްޤީކޮށް، އެ ތަންތަނުގައި ވަޒިފާ އަދާ ކުރާ މީހުންނަށް ފަސޭހައިން ރަށަށް ގޮސް އައިސް އުޅެވޭނެ ގޮތް ފަހިކޮށްދިނުން ކަމުގައި ވެސް އެމަނިކުފާނު ވިދާޅުވިއެވެ.

މި މަހުގެ ފަސްވަނަ ދުވަހު އިއްވެވި ރިޔާސީ ބަޔާނުގައި ވެސް ރައީީސް ވަނީ މި ދައުރުގެ ތެރޭގައި މުޅިން އަލަށް 20 ރިސޯޓު ހުޅުވާނެ ކަމަށް ވިދާޅުވެފައެވެ.