ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތ.އަތޮޅު ކައުންސިލާ ބައްދަލުކުރައްވައި، އަތޮޅުގެ ރައްޔިތުންގެ ކަންބޮޑުވުންތަކަށް އުއްމީދީ ޖަވާބުތަކެއް ދެއްވައިފިއެވެ.
ތ.އަތޮޅުގެ ކައުންސިލާއިއެކުގައި ރައީސް މުޢިއްޒު ބޭއްވެވި ބައްދަލުކުރެއްވުން ކުރިއަށްދިޔައީ ރޭ ކޮޅުމަޑުލު އަތޮޅު ކައުންސިލް އިދާރާގައެވެ.
މި ބައްދަލުކުރެއްވުމުގައި ކައުންސިލުން ވަނީ ތ އަތޮޅުގެ ރަށްތަކުގެ ރައްޔިތުންގެ ހުރި ކަންބޮޑުވުންތައް ރައީސް އަޑުއައްސަވައި، އުންމީދީ ޖަވާބުތަކެއް ދެއްވިކަން ޝުކުރުވެރިކަމާއެކު ފާހަގަކުރައްވާފައެވެ.
މި ބައްދަލުކުރެއްވުމުގައި ތ އަތޮޅުގެ ކައުންސިލުން ވަނީ އަތޮޅުގެ ތަރައްޤީއަށް އެންމެ ބޭނުންވާނެ ކަންތައްތައް ތަފުސީލީ ގޮތެއްގައި ރައީސްއާ ޙިއްޞާކުރައްވާފައެވެ.
އެގޮތުން އަތޮޅު ހޮސްޕިޓަލަކީ ޒަމާނީ ޚިދުމަތްދޭ ތަނަކަށް ހެދުމަށާއި، އަތޮޅުގައި ހަތަރު ރަށެއް ފަތުރުވެރިކަމަށް ތަރައްޤީކުރުމަށް ބޭނުންވާކަމަށް ކައުންސިލުން ފާހަގަ ކުރެއްވިއެވެ.
އަދި ތ އަތޮޅުގައި ބައިނަލްއަޤްވާމީ ވައިގެ ބަނދަރަކާއެކު އިކޮނޮމިކް ޒޯނެއް ޤާއިމުކުރުމަށް ބޭނުންވާކަމުގައިވެސް ކައުންސިލުން ފާހަގަކުރެއްވިއެވެ.
މީގެ އިތުރުން، އަތޮޅުގައި ހުރި މަސް ފެކްޓްރީ ތަރައްޤީކުރުމަށް ބޭނުންވާކަމަށާއި، އަތޮޅު ތެރޭގައި ދަތުރުފަތުރު ކުރުމުގައި ހުރި ގޮންޖެހުންތައްވެސް ކައުންސިލުންވަނީ ރައީސްއާ ޙިއްޞާ ކުރައްވާފައެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ ހޮސްޕިޓަލް އަޕްގްރޭޑްކުރުމުގެ މަސައްކަތް ކުރައްވާނެކަމަށެވެ.
އަދި އެމަނިކުފާނު ވަނީ އަތޮޅުގެ އިޤްތިޞާދު ވަރުގަދަކުރުމަށް މި ސަރުކާރުން ކުރައްވާ ކަންކަން އަތޮޅު ކައުންސިލާ ޙިއްޞާކުރައްވާފައެވެ.
މީގެ އިތުރުންވެސް ކޮންމެ ކައުންސިލަކަށްވެސް ފައިދާވާނެ ގޮތަކަށް އިޙްތިޞާޞްގައި ހުރި ރަށްތައް ބޭނުންކޮށް، އާންމު ފަރުދުންގެ މާލީ ތަނަވަސްކަން އިތުރުކުރުމަށް އެމަނިކުފާނު ބާރުއެޅުއްވިއެވެ. ހަމަ އެއާއެކު ސަރުކާރުގެ މައިގަނޑު ސިޔާސަތުތަކާ ގުޅުންހުރި ދާއިރާތަކުން އިންވެސްޓަރުން ހޯދުމުގެ ފުރުޞަތު ހުރިހާ ކައުންސިލަކަށްވެސް އޮންނާނެ ކަމަށާއި އެކަމަށް ސަރުކާރުން ފުރިހަމަ އެއްބާރުލުން ދެއްވާނެކަމުގައި ރައީސް ވިދާޅުވިއެވެ.
އަދި ތ އަތޮޅަށް ތަރައްޤީގެ ފުރިހަމަ އިހުސާސްކުރެވޭވަރު މި ސަރުކާރުން ކޮށްދެއްވާނެކަމުގައި އެމަނިކުފާނު ވިދާޅުވިއެވެ.
