ތ.ކނބިދޫއާއި ވޭމަންޑޫ ކޯޒްވޭއަކުން ގުޅާލާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު ރައްޔިތުންނަށް މި ޔަޤީންކަން ދެއްވީ ކިނބިދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވީ، ކިނބިދޫގެ ރައްޔިތުންގެ އުންމީދުތައް ހަގީގަތަކަށް ހަދައިދޭނެ ކަމަށާއި އެންމެ މުހިންމު ކަމަކީ އިޤްތިޞާދީ ކުރިއެރުން ގެނެސްދިނުން ކަމަށެވެ.
ތަރައްޤީ ބައްޓަންކުރުމުގައި ދަތުރުފަތުރުކުރުމުގެ ނިޒާމު މުހިންމު ދައުރެއް އަދާކުރާކަން ފާހަގަކުރައްވާ ރައީސް ވިދާޅުވީ ދުނިޔޭގެ އެކިގައުމުތަކަށް ތަރައްގީ އައިއިރުވެސް އައިސްފައިވަނީ މަގުތަކާއި، ބްރިޖްތައް، ކެނަލްތައް އަދި ޓަނަލްތައް ހަދައިގެން ކަމަށެވެ. ރާއްޖޭގައި މިހާތަނަށް އެޅިފައިވަނީ އެއް ބްރިޖްކަމަށާއި ދެވަނަ ބްރިޖެއްގެ މަސައްކަތް ކުރަމުންދާކަން ފާހަގަކުރެއްވިއެވެ. އަދި ރާއްޖެ ތަރައްޤީ ކުރުމުގައި އެހެން ގައުމުތަކުންވެސް ތަރައްގީ ހާސިލުކޮށްފައިވާ ގޮތަށް އަމަލުކުރައްވާނެ ކަމަށް ވިދާޅުވިއެވެ.
ރައީސް މުޢިއްޒު ވިދާޅުވީ ކިނބިދޫގެ ރައްޔިތުންނަށް އެންމެ މުހިންމީ ކިނބިދޫއާ ވޭމަންޑޫ ކޯޒްވޭއަކުން ގުޅިގެން ދިޔުން ކަމަށާއި، އެކަން ހާސިލުކޮށްދޭނެ ކަމުގެ ޔަގީންކަން އަރުވާކަމަށެވެ. އަދި މަޑިފުއްޓާއި ދިޔަމިގިލިވެސް ކޯޒްވޭއަކުން ގުޅާލާނެކަމުގެ ޔަޤީންކަން ރައީސް އެރުވިއެވެ.
ތަރުތީބެއް ކަނޑައަޅައިގެން ތަރައްޤީގެ މަޝްރޫޢުތައް ގެންދެވިގެން ނޫނީ މިހާރު އޮތް އިޤްތިޞާދީ އަނދަވަޅުން އަރައިގަނެގެން މާނަހުރި ދެކޮޅުޖެހޭ، ދެމެހެއްޓެނިވި ތަރައްގީ ނުގެނެވޭނެ ކަމަށް ވެސް ރައީސް މުޢިއްޒު ވިދާޅުވިއެވެ.
މި މޭރުމުން ވާހަކަފުޅު ދައްކަވަމުން، ރައީސް ވަނީ ރަށްރަށަށް ގެންނަން ބޭނުންވާ ތަރައްޤީގެ މަޝްރޫޢުތައް ތަރުތީބު ކޮށްދިނުމަށް ކައުންސިލްތަކުގެ ކިބައިން އެދިވަޑައިގެންފައެވެ.
