އެއް މަސްދުވަސްތެރޭ ރާއްޖޭގެ ހުރިހާ ރަށެއްގެ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާ، ބައްދަލުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައި ވަނީ ތ. ކިނބިދޫގައި ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވީ އެއް މަސްދުވަސްތެރޭގައި ރާއްޖޭގެ ހުރިހާ ކައުންސިލްތަކާއި ބައްދަލުކުރެއްވުމުގެ ބޭނުމަކީ ރައްޔިތުންގެ ޝަކުވާތައް އަޑުއަހައި ރައްޔިތުންނާއި ގާތުން މަސައްކަތް ކުރެއްވުން ކަމަށެވެ.
”އަޅުގަނޑު ހުންނަތަނަށް ކައުންސިލް ގެނެސްގެން ކައުންސިލާ ބައްދަލުކުރާކަށް ނޫން ބޭނުމީއެއް. ކައުންސިލް އޮތްތަނަށް އަޅުގަނޑު ދާން ބޭނުންވަނީ.“
ރައީސް ވިދާޅުވީ ރާއްޖެއިން ބޭރަށް ދިޔުމަށް ހަމަޖެހިފައިވާ ދަތުރު ނިންމާލުމަށްފަހު އެނބުރިވަޑައިގެން މަހެއްހާ ދުވަސްތެރޭ ހުރިހާ ކައުންސިލްތަކާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކާއި އެމަނިކުފާނު ބައްދަލުކުރައްވާނެ ކަމަށެވެ.
