މާލެ އާއި މާލެ ކައިރި ސަރަހައްދަށް ދިމާވެފައިވާ ބޯހިޔާވަހިކަމުގެ ބޮޑު މައްސަލައަށް ސަރުކާރުން ޙައްލު ގެނެސްދެއްވުމުން، ކުށްތަކަށް އަރައިގަތުމުގެ މައްސަލަ ވަރަށް ބޮޑަށް މަދުވެގެންދާނެ ކަމަށް ހޯމް މިނިސްޓަރު ޢަލީ އިހުސާން ވިދާޅުވެއްޖެއެވެ.
ސަންގު ޓީވީގެ ޕްރޮގްރާމެއްގައި ވާހަކަ ދައްކަވަމުން މިނިސްޓަރު ވިދާޅުވީ ކުށުގެ ވެއްޓެއް އޮންނާން މެދުވެރިވާ އެންމެ ބޮޑު އެއް ސަބަބަކީ ”ޕޮޕިއުލޭޝަން ޑެންސިޓީ“ ކަމަށެވެ. އެއްތަނެއްގައި މާގިނަ ބަޔަކު ދިރިއުޅެން ޖެހުމަކީ އެކި ކަހަލަ ކުށް ކުރުން އިތުރުވެގެންދާނެ ކަމެއް ކަމަށް މިނިސްޓަރު ވިދާޅުވިއެވެ.
”އަދުގެ ރައީސުލްޖުމްހޫރިއްޔާގެ ޚާއްޞަ ސިޔާސަތެއްގެ ދަށުން އެބަ ގެންގުޅުއްވާ، ޚާއްޞަކޮށް، މާލެއާއި، މި ގުޅިފައިވާ ސަރަހައްދު އެއްކޮށް ބޯހިޔާވަހިކަމުގެ މައްސަލަ ޙައްލުކުރުން، އިނގޭތޯ؟ މީގެ ތެރެއިން މި އަންނަ ސޯޝަލް އެންވަޔަރްމަންޓް ތެރޭގައި، އަސްލު ކުށުގެ މާހައުލު އުފެދިގެން މި އަންނަނީ.“ ހޯމް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، މީގެ އިތުރުން ވެސް، ކުށް މަދު ކުރުމަށްޓަކައި ކްރައިމް ޕްރިވެންޝަން އަށް ކުރާ މަސައްކަތް ވެސް ވަރަށް ބޮޑަށް އިތުރު ކުރަން ޖެހޭ ކަމަށެވެ.
ފުލުހުންނާ، ތަންފީޒީ އިދާރާތަކާއި ގުޅިގެން ވަރަށް އަވަހަށް އެ މަސައްކަތް ފަށާނެ ކަމަށް ވެސް މިނިސްޓަރު ވިދާޅުވިއެވެ.
މީގެ އިތުރުން އިހުސާން ވިދާޅުވީ، މާލޭގައި ތޮއްޖެހިގެން އެތައް ބަޔަކު ދިރިއުޅެމުން އަންނައިރު، ޕޮލިސިންގެ ޚިދުމަތް ވަރަށް ބޮޑަށް ވަރުގަދަ ވާން ޖެހޭ ކަމަށެވެ. އެގޮތުން، މާލޭގެ މަގެއް މަތީގައި އެންމެ ގިނަވެގެން 10 ވަރަކަށް މިނެޓު ހިނގާާލާއިރު، ފުލުހެއް ފެންނަ ވަރަށް، ފުލުހުންގެ ޚިދުމަތް ފުޅާ ކުރެވެން ޖެހޭނެ ކަމަށް މިނިސްޓަރު ވިދާޅުވިއެވެ.
