ގައުމީ އަންހެން ފުޓްބޯޅަ ޓީމުގެ ކުރީގެ ކުޅުންތެރިޔާމަރިޔަމް މުހައްމަދު (މާޔަން) ހުޅުމާލޭގައި ފަތިހު ދުވަން ނުކުމެ އުޅެނިކޮށް އޭނާގެ ކަރުގައި އޮތް ރަން ފަށް ބަޔަކު ފޭރިގެންފިއެވެ.
މިކަން ހިނގާފައިވާކަން ހާމަކޮށް، މާޔަން މިއަދު ފޭސްބުކްގައި ކުރި ޕޯސްޓެއްގައި ބުނީ، މިއަދު ހެނދުނު ގާތްގަނޑަކަށް ހެނދުނު 6:15 ހާއިރު ހުޅުމާލެ ކްލޭ ސްޓޫޑިއޯ ކައިރިން އޭނާ ދުވެފައި ދަނިކޮށް، ސައިކަލެއްގައި ދިޔަ ދެ މީހަކު އޭނާ ބިންމައްޗަށް ވައްޓާލުމަށް ފަހު ކަރުގައި އޮތް ރަންފަށް ފޭރިގެންފައިވާ ކަމަށެވެ.
އޭނާ ވަނީ އެ މައްސަލަ ފުލުހުންނަށް ވެސް ހުށަހަޅާފައެވެ.
ރަން ފަށުގެ ފޮޓޯއެއް އާންމުކޮށް މާޔަން ވަނީ އެ ފަށް ވިއްކަން ބަޔަކު އުޅޭނަމަ ނުވަތަ އެ ފަށް ފެނިއްޖެނަމަ އަންގަައި ދިނުމަށް އެދިފައެވެ.
އެ މައްސަލައާ ގުޅިގެން ފުލުހުން މިއަދު ބުނީ ސައިކަލެއްގައި ދިޔަ ދެ މީހަކު ހުލުމާލެ ރީތިގަސް މަގުން ހިނގާފައި ދިޔަ އަންހެނެއްގެ ކަރުގައި އޮތް ފަށެއް ފޭރިގެންފައިވާ މައްސަލައެއް މިއަދު ހެނދުނު 6:20 ހާއިރު ހުށަހަޅާފައިވާ ކަމަށާއ، އެ މައްސަލަ ބަލަމުން އަންނަ ކަމަށެވެ.
